جھنگ:سی ایم یوتھ گیمز، نجی سکولوں کے طلبہ و طالبات کی بھرپور شرکت یقینی بنانے کی ہدایت،ڈپٹی کمشنر

جھنگ: ڈپٹی کمشنر بابر صاحب دین کی زیرِ صدارت پرائیویٹ سکولز کے سربراہان کا اجلاس منعقد ہوا، جس میں وزیرِ اعلیٰ پنجاب مریم نواز شریف کی ہدایات کے تحت سی ایم یوتھ گیمز کے انعقاد، نوجوانوں کی کھیلوں میں شرکت اور انہیں کھیلوں کی بہتر سہولیات و مواقع فراہم کرنے کے حوالے سے تفصیلی غور کیا گیا۔

اجلاس سے خطاب کرتے ہوئے ڈپٹی کمشنر بابر صاحب دین نے ہدایت کی کہ سی ایم یوتھ گیمز میں نجی سکولوں کے طلبہ و طالبات کی بھرپور شرکت کو یقینی بنایا جائے اور انہیں مختلف کھیلوں میں اپنی صلاحیتوں کے اظہار کے زیادہ سے زیادہ مواقع فراہم کیے جائیں۔

انہوں نے کہا کہ نوجوان نسل میں کھیلوں کا رجحان فروغ دینا اور انہیں صحت مند و مثبت سرگرمیوں کی جانب راغب کرنا وقت کی اہم ضرورت ہے۔ کھیل نوجوانوں کی جسمانی و ذہنی نشوونما کے ساتھ ساتھ ان میں نظم و ضبط، ٹیم ورک اور مثبت مسابقت کا جذبہ بھی پیدا کرتے ہیں۔

ڈپٹی کمشنر نے نجی سکولوں کی انتظامیہ کو ہدایت کی کہ سی ایم یوتھ گیمز کے مختلف مقابلوں میں طلبہ و طالبات کی شرکت کو یقینی بنانے کے لیے مؤثر اقدامات کیے جائیں اور باصلاحیت نوجوان کھلاڑیوں کی حوصلہ افزائی کی جائے۔

انہوں نے محکمہ سپورٹس کے افسران کو بھی ہدایت کی کہ سی ایم یوتھ گیمز کے لیے زیادہ سے زیادہ کھلاڑیوں کی رجسٹریشن یقینی بنائی جائے اور نجی سکولوں کے ساتھ مؤثر رابطہ قائم کرکے زیادہ سے زیادہ نوجوانوں کو اس پروگرام کا حصہ بنایا جائے۔