ڈپٹی کمشنر علی اکبر بھنڈر کی ہدایت پر آئندہ شروع ہونے والی انسداد پولیو مہم کی تیاریوں اور ٹیموں کی ٹریننگ کی نگرانی کے حوالہ سے سی ای او ہیلتھ ڈاکٹر محمد احمد شہزاد نے ایریا انچارج اور یونین کونسل کے یو سی ایم اوز سے میٹنگ کی جس میں محکمہ صحت کے افسران اور دیگر بھی موجود تھے۔ اجلاس سے خطاب کرتے ہوئے سی ای اوہیلتھ ڈاکٹر محمد احمد شہزاد نے کہا کہ انسداد پولیو مہم کے حوالہ سے بھرپور آگاہی مہم شروع کی جائے اوراس مہم میںشہریوں، سول سوسائٹی اور علماءکرام کو بھی شامل کیا جائے۔ والدین اپنے بچوں کو پولیو سے بچاﺅ کی ویکسئین کے قطرے پلاکر عمر بھر کی معذوری سے بچائیں۔ مہم سے قبل تمام میڈیکل آفیسر سمیت پولیو ورکزز کی ٹریننگ انتہائی ناگزیر ہے۔انہوںنے کہا کہ ضلعی انتظامیہ کی جانب سے انسداد پولیو مہم کی براہ راست مانیٹرنگ جاری رہے گی لہٰذا اس ضمن میں کسی قسم کوتاہی اور سستی ہر گز نہیں ہونی چاہیے۔ پولیو سے پاک پاکستان حکومت کی فرنٹ لائن پالیسی اور ہمارا اولین فریضہ ہے۔