جھنگ میں انسدادِ سموگ مہم تیز، زگ زیگ ٹیکنالوجی کی خلاف ورزی کرنے والے بھٹوں، فصلوں کی باقیات جلانے اور دھواں چھوڑنے والی گاڑیوں کے خلاف کارروائی کا حکم،ڈپٹی کمشنر

جھنگ: وزیراعلیٰ پنجاب مریم نواز شریف کی ہدایات پر انسدادِ سموگ مہم پر مؤثر عملدرآمد کے لیے ضلعی انتظامیہ متحرک ہو گئی۔ ڈپٹی کمشنر کیپٹن (ر) عبدالرحمن کی زیر صدارت اجلاس میں ضلع بھر میں جاری انسدادِ سموگ اقدامات کا تفصیلی جائزہ لیا گیا اور متعلقہ محکموں کو کارروائیاں تیز کرنے کی ہدایات جاری کی گئیں۔

اجلاس کے دوران ڈپٹی کمشنر نے زگ زیگ ٹیکنالوجی کی خلاف ورزی کرنے والے بھٹوں کے خلاف فوری کارروائی کا حکم دیا۔ انہوں نے فصلوں کی باقیات جلانے، دھواں چھوڑنے والی گاڑیوں اور صنعتی آلودگی کے ذمہ دار عناصر کے خلاف بھی مؤثر کارروائیاں تیز کرنے کی ہدایت کی۔

ڈپٹی کمشنر نے ٹریفک پولیس، ستھرا پنجاب ایجنسی اور واسا جھنگ کے افسران کو انسدادِ سموگ اقدامات پر مؤثر عملدرآمد یقینی بنانے اور فیلڈ میں نگرانی مزید سخت کرنے کی ہدایت کرتے ہوئے کہا کہ تمام متعلقہ محکمے اپنی ذمہ داریاں پوری کریں اور حکومتی ہدایات پر سختی سے عملدرآمد یقینی بنائیں۔

انہوں نے واضح کیا کہ ماحولیاتی آلودگی کے خاتمے اور شہریوں کو صاف ستھرا ماحول فراہم کرنے کے لیے کسی قسم کی غفلت برداشت نہیں کی جائے گی۔