اسلام آباد: سینٹرل ڈیولپمنٹ ورکنگ پارٹی نے اعلیٰ تعلیم، سیاحت اور مواصلات کے شعبوں میں 151 ارب ڈالر مالیت کے 6 ترقیاتی منصوبوں کی منظوری دے دی۔

یہ منظوری آج اسلام آباد میں منعقدہ اجلاس میں دی گئی، جس کی صدارت وفاقی وزیر برائے منصوبہ بندی احسن اقبال نے کی۔

منظور شدہ منصوبوں میں نیشنل سینٹر فار نینوسائنس اینڈ نینو ٹیکنالوجی کا قیام، نیشنل سینٹر فار مینو فیکچرنگ کا قیام، جامعہ کراچی میں تعلیمی سہولیات کی بہتری، خیبرپختونخوا انٹیگریٹڈ ٹورازم ڈویلپمنٹ پراجیکٹ اور خیبرپختونخوا رورل ایکسیسبلیٹی پراجیکٹ شامل ہیں۔

اجلاس سے خطاب کرتے ہوئے وفاقی وزیر منصوبہ بندی نے ہائر ایجوکیشن کمیشن کے چیئرمین کو ہدایت کی کہ وہ بلوچستان کے نوجوانوں کے لیے تعلیمی اور ترقیاتی مواقع کی فراہمی کو یقینی بنانے کے لیے فوری طور پر ایک جامع اور مؤثر حکمت عملی مرتب کریں۔

انہوں نے حکومت کے نوجوانوں کی فلاح و بہبود اور ان کے روشن مستقبل کے عزم کا اعادہ کیا۔