غیر قانونی اسلحہ رکھنے، نمائش اور خرید و فروخت کے خلاف سخت کریک ڈاؤن کا حکم، ڈی پی او ساجد حسین

ڈی پی او جھنگ ساجد حسین نے ضلع بھر میں غیر قانونی اسلحہ رکھنے، اس کی نمائش، خرید و فروخت اور ترسیل میں ملوث عناصر کے خلاف سخت کریک ڈاؤن کا حکم دیتے ہوئے پولیس افسران کو کارروائیوں کی روزانہ کی بنیاد پر نگرانی اور کارکردگی رپورٹ پیش کرنے کی ہدایت کی ہے۔

ڈی پی او ساجد حسین نے کہا کہ غیر قانونی اسلحہ کے ذریعے خوف و ہراس پھیلانے والے قانون شکن عناصر کسی رعایت کے مستحق نہیں، قانون سے بالاتر کوئی نہیں اور اسلحہ کی نمائش یا غیر قانونی استعمال کے خلاف بلاامتیاز کارروائی یقینی بنائی جائے۔

انہوں نے پولیس افسران کو ہدایت کی کہ غیر قانونی اسلحہ رکھنے، اس کی خرید و فروخت، ترسیل اور نمائش میں ملوث افراد کے خلاف زیرو ٹالرنس پالیسی کے تحت کارروائی کی جائے اور خلاف ورزی کے مرتکب افراد کے خلاف فوری طور پر مقدمات درج کیے جائیں۔

ڈی پی او نے کہا کہ کارروائیوں میں کسی قسم کی غفلت یا سستی برداشت نہیں کی جائے گی، جبکہ ایس ڈی پی اوز اپنے اپنے سرکلز میں غیر قانونی اسلحہ کے خلاف جاری کارروائیوں کی براہِ راست نگرانی کریں اور روزانہ کی بنیاد پر پیش رفت سے آگاہ کریں۔

انہوں نے مزید ہدایت کی کہ پولیس افسران قانون کی عملداری، شہریوں کے تحفظ اور امن و امان کے قیام کو یقینی بنانے کے لیے مؤثر اقدامات جاری رکھیں، جبکہ غیر قانونی اسلحہ کے خلاف کریک ڈاؤن کو مزید مؤثر بنایا جائے۔