وزیراعظم شہباز شریف نے متعلقہ حکام کو پی آئی اے کی نجکاری میں شفافیت یقینی بنانے کی ہدایت کی ہے۔

انہوں نے اسلام آباد میں پی آئی اے کی نجکاری کے جاری عمل کا جائزہ لینے کیلئے ایک اجلاس کی صدارت کرتے ہوئے کہا کہ قومی فضائی کمپنی اور مستقبل میں تمام سرکاری اداروں کی نجکاری ٹیلی ویژن اور ڈیجیٹل پلیٹ فارمز پر براہ راست نشر کی جائے۔

شہباز شریف نے کہا کہ مجوزہ مدت میں پی آئی اے کی نجکاری یقینی بنائی جائے۔

انہوں نے نجکاری کے عمل کے حوالے سے سرمایہ کاروں کو مکمل اعتماد میں لینے کیلئے روڈ شوز کے انعقاد کی بھی ہدایت کی۔

اجلاس کو بتایا گیا کہ سرمایہ کاروں کیلئے کنسلٹنٹ کے ساتھ مل کر ایک جامع حکمت عملی وضع کی گئی ہے اور اس پر مکمل عمل درآمد کیا جارہا ہے۔