پاک فوج کے شعبۂ تعلقاتِ عامہ (آئی ایس پی آر) کے مطابق، سیکیورٹی فورسز نے بدھ کے روز بلوچستان کے ضلع آواران میں خفیہ اطلاعات پر مبنی ایک کامیاب آپریشن کیا، جس میں بھارت کی پشت پناہی سے چلنے والے دہشت گرد گروہ “فتنہ الہندستان” کے تین دہشت گردوں کو جہنم واصل کر دیا گیا۔

آپریشن کے دوران پاک فوج کے جوانوں نے دہشت گردوں کے ٹھکانے کو مؤثر انداز میں نشانہ بنایا۔ دشمن کے ساتھ شدید فائرنگ کے تبادلے میں میجر سید ربنواز طارق، جو کہ ضلع مظفرآباد کے رہائشی اور ایک دلیر افسر تھے، دشمن کا بہادری سے مقابلہ کرتے ہوئے جامِ شہادت نوش کر گئے۔ وہ اپنے دستے کی قیادت محاذِ جنگ پر سامنے سے کر رہے تھے۔

فوجی دستے علاقے میں کلیئرنس آپریشن جاری رکھے ہوئے ہیں تاکہ ممکنہ طور پر موجود دیگر دہشت گردوں کا خاتمہ کیا جا سکے۔

آئی ایس پی آر نے بیان میں کہا کہ پاکستان کی سیکیورٹی فورسز ملک سے بھارت کی سرپرستی میں ہونے والی دہشت گردی کے ناسور کا مکمل خاتمہ کرنے کے لیے پُرعزم ہیں، اور ہمارے بہادر جوانوں کی یہ لازوال قربانیاں اس عزم کو مزید تقویت فراہم کرتی ہیں۔