احمد پور سیال، پیر عبدالرحمن میں 2 موٹر سائیکلز میں تصادم 2 افراد زخمی، ریسکیو

اے پی سیال کے علاقے پیر عبدالرحمن کے قریب دو تیز رفتار موٹرسائیکل سواروں کے درمیان تصادم کے نتیجے میں دو نوجوان زخمی ہو گئے۔ حادثے کی اطلاع ملتے ہی ریسکیو 1122 کی ٹیم فوری طور پر موقع پر پہنچ گئی اور امدادی کارروائیاں شروع کر دیں۔

ریسکیو 1122 کنٹرول روم کو موصول ہونے والی کال میں بتایا گیا کہ دو موٹرسائیکلیں تیز رفتاری کے باعث آپس میں ٹکرا گئی ہیں، جس کے نتیجے میں دونوں سوار زخمی ہو گئے۔ اطلاع ملنے پر قریبی ایمبولینس کو فوری طور پر جائے حادثہ کی جانب روانہ کیا گیا۔

ریسکیو اہلکاروں نے موقع پر پہنچ کر زخمیوں کو ابتدائی طبی امداد فراہم کی اور بعد ازاں انہیں مزید علاج کے لیے تحصیل ہیڈ کوارٹر ہسپتال اے پی سیال منتقل کر دیا۔

زخمیوں میں 17 سالہ زین عباس ولد بشیر احمد اور 15 سالہ مزمل عباس ولد ذوالفقار شامل ہیں، جن کا تعلق اڈہ کسوآنہ سے بتایا گیا ہے۔