پاکستان کی مسلح افواج کی پیشہ ورانہ مہارت، جرات اور عزم کو عالمی میڈیا اور بین الاقوامی دفاعی ماہرین کی جانب سے زبردست خراج تحسین پیش کیا گیا ہے۔

بی بی سی کے مطابق، پاکستان نے بھارت پر عسکری برتری ثابت کر دی جبکہ بھارتی حکمتِ عملی بری طرح ناکام رہی۔ رپورٹ میں کہا گیا کہ بھارت فیصلہ کن ضرب لگانے میں ناکام رہا اور نئی دہلی کی جانب سے خرچ کیے گئے اربوں ڈالر بے فائدہ ثابت ہوئے۔ بی بی سی نے تسلیم کیا کہ پاکستان کی فضائی قوت نے بھارت کے لیے بڑا چیلنج پیدا کیا۔

ٹیلی گراف نے پاکستان کی مؤثر دفاعی حکمت عملی کی تعریف کی اور بھارتی لڑاکا طیاروں کی کارکردگی پر سنگین سوالات اٹھائے۔ رپورٹ میں جدید بھارتی طیاروں، خصوصاً رافیل جیسے مہنگے جنگی طیاروں کی تباہی کو بھارت کے لیے “ذلت آمیز شکست” قرار دیا گیا، اور پاکستان ایئر فورس کو “فضا کا بلا شرکت غیرے بادشاہ” قرار دیا۔ ٹیلی گراف کے مطابق، پاکستانی طیاروں نے جدید ایئر ٹو ایئر میزائلز استعمال کرتے ہوئے بھارت کے پانچ جنگی طیارے مار گرائے، جن میں رافیل جیسے قیمتی طیارے بھی شامل تھے، جس سے نہ صرف پاکستان کی فضائی برتری ثابت ہوئی بلکہ دنیا بھر کے دفاعی ماہرین حیران رہ گئے۔

الجزیرہ نے اپنی رپورٹ میں بتایا کہ تاریخ میں پہلی مرتبہ رافیل طیاروں کو تباہ ہوتے دیکھا گیا۔

دفاعی تجزیہ کاروں نے اعتراف کیا کہ پاکستان نے بھارتی فوجی کیمپوں اور فضائی اڈوں کو بھاری نقصان پہنچایا۔ ان کے مطابق، پاکستان کی جوابی کارروائی کے بعد بھارت نے امریکہ سے سفارتی مداخلت کی درخواست کی تاکہ فوری جنگ بندی ممکن بنائی جا سکے۔

ماہرین نے واضح کیا کہ تمام شواہد اس بات کی تصدیق کرتے ہیں کہ پاکستان کسی بھی بھارتی جارحیت کا بھرپور جواب دینے کی مکمل صلاحیت رکھتا ہے اور علاقائی امن کے لیے اپنی فضائی اور عسکری برتری کو برقرار رکھ سکتا ہے۔