جھنگ میں بھنگ والے پکوڑے کھانے سے دو افراد کی حالت غیر، چنیوٹ روڈ پر فائرنگ سے 18 سالہ نوجوان زخمی

جھنگ: ضلع جھنگ میں دو مختلف واقعات کے دوران بھنگ والے پکوڑے کھانے سے دو افراد کی حالت غیر ہو گئی جبکہ چنیوٹ روڈ پر نامعلوم مسلح افراد کی فائرنگ سے ایک نوجوان زخمی ہو گیا۔ ریسکیو 1122 نے دونوں واقعات میں متاثرہ افراد کو طبی امداد فراہم کی۔

تفصیلات کے مطابق رستم سرگانہ، وڑیاں والا روڈ جھنگ میں بھنگ والے پکوڑے کھانے سے 28 سالہ شہزاد ولد رمضان اور 35 سالہ کریم اللہ ولد شبیر احمد کی حالت غیر ہو گئی۔ واقعے کی اطلاع ملنے پر ریسکیو 1122 کی ایمبولینس موقع پر پہنچ گئی اور ریسکیو اہلکاروں نے دونوں متاثرہ افراد کو ابتدائی طبی امداد فراہم کرنے کے بعد ڈسٹرکٹ ہیڈ کوارٹرز ہسپتال جھنگ منتقل کر دیا۔

دوسرے واقعے میں چنیوٹ روڈ پر 15ویں میل کے قریب مبینہ طور پر موٹر سائیکل پر سوار تین نامعلوم افراد نے 18 سالہ زمان ولد انور پر فائرنگ کر دی، جس کے نتیجے میں وہ دائیں پاؤں پر گولی لگنے سے زخمی ہو گیا۔ واقعے کی اطلاع ملنے پر ریسکیو 1122 کا عملہ موقع پر پہنچا اور زخمی نوجوان کو ابتدائی طبی امداد فراہم کی، تاہم اس کے لواحقین نے اسے ہسپتال منتقل کرنے سے انکار کر دیا۔

دونوں واقعات میں ریسکیو 1122 کے عملے نے فوری کارروائی کرتے ہوئے متاثرہ افراد کو طبی امداد فراہم کی۔ فائرنگ کے واقعے میں ملوث افراد اور واقعے کی وجوہات سے متعلق مزید تفصیلات فراہم نہیں کی گئیں۔