جھنگ میں پتنگ ساز فیکٹری پر چھاپہ، بھاری تعداد میں پتنگیں اور خام مال برآمد، ملزم گرفتار

جھنگ: ڈی پی او جھنگ ساجد حسین کی ہدایات پر پتنگ سازی اور فروخت میں ملوث افراد کے خلاف کریک ڈاؤن جاری ہے۔ خفیہ اطلاعات پر ریسکیو شاہین اسکواڈ نے کارروائی کرتے ہوئے پتنگ ساز فیکٹری پر چھاپہ مارا اور وہاں سے بھاری تعداد میں تیار پتنگیں اور پتنگ سازی میں استعمال ہونے والا خام مال برآمد کر لیا۔

پولیس نے موقع سے پتنگ سازی اور فروخت میں ملوث ایک ملزم کو گرفتار کرکے اس کے خلاف تھانہ سٹی میں مقدمہ درج کر لیا ہے۔ پولیس کی جانب سے پتنگ سازی اور اس کی خرید و فروخت میں ملوث دیگر افراد کے خلاف بھی کارروائیاں جاری رکھنے کا عزم ظاہر کیا گیا ہے۔

ڈی پی او ساجد حسین نے کہا ہے کہ اس جان لیوا کھیل کا کاروبار کرنے والے قانون کی گرفت سے نہیں بچ سکیں گے اور معصوم جانوں کو خطرے میں ڈالنے والوں کے خلاف بلاامتیاز سخت قانونی کارروائی عمل میں لائی جائے گی۔

انہوں نے والدین پر زور دیا کہ وہ اپنے بچوں کو پتنگ بازی اور کیمیکل ڈور کے خطرناک استعمال سے روکیں تاکہ کسی بھی ناخوشگوار واقعے اور قیمتی انسانی جانوں کے ضیاع سے بچا جا سکے۔