اللهم صل على محمد وال محمد
(درود پاک دی فضیلت )

سورت الاحزاب وچ الله تعالیٰ ارشاد فرماوندا اے
الله تعالی اس دے فرشتے نبی کریم صلی اللہ علیہ وآلہ وسلم اتے درود بھیجدے نیں
اے ایمان والیو!
تسیں وی اوہناں اتے درود بھیجو تے اوہناں اتے انج سلام بھیجو جیویں سلام بھیجن دا حق اے
خدا دے دردود بھیجن دا مطلب اوہناں اتے رحمت نازل کرنا اے
فرشتیاں دے درود بھیجن دا مطلب استغفار کرنا اے تے مومناں دے دردود بھیجن دا مطلب رحمت طلب کرنا اے
حضورِ اکرم ص نے فرمایا
جیہڑا مومن میرے اتے اک واری دردود پڑھدا اے خدا اوس اتے دس واری درود بھیجدا اے تے جیہڑا مومن میرے اتے دس واری درود بھیجدا اے رب اس اتے سو واری درود بھیجدا اے تے جیہڑا مومن میرے اتے سو واری درود بھیجدا اے رب اس اتے ہزار واری درود بھیجدا اے تے جیہڑا مومن میرے اتے اک ہزار واری درود بھیجدا اے خدا اس نوں ہمیشہ لئی دوزخ دی اگ توں امان عطا کردا اے
اک ہور حدیث نبوی ص وچ ارشاد ہوندا اے
جیہڑا مومن میرے اتے اک واری دردود بھیجدا اے خدا اس لئی عافیت دا اک دروازہ کھول دیندا اے تے اس دا اک وی گناہ باقی نہیں رہندا
حضورِ اکرم ص دا ارشاد اے
جیہڑا میرے اتے اک واری دردود بھیجسیں خدا قیامت دے دن اس اتے تھلے تے سجے کھبے اک نور پیدا کر دیسیں جیہڑا اس دے سارے جسم نوں نورانی بنا دیسیں
آپ ص نے ایہ وی فرمایا
جیہڑا میرے اتے درود بھیجنا بُھل گیا اوہنے جنت دی راہ گم کر دتی
فرمایا
دردود بھیجن والے نوں پل صراط اتے اک نور عطا ہوسیں جس نوں صراط اتے نور حاصل ہو جاوے اوہ جہنم والیاں وچوں نہیں ہووے گا
حضرت عبداللہ بن عوف رض روایت کردے نیں
حضورِ اکرم ص نے فرمایا
مینوں حضرت جبرائیل علیہ السلام نے فرمایا
اے محمد ص جیہڑا تہاڈی ذات بابرکات اتے درود بھیجسیں اس اتے ستر ہزار فرشتے دردود بھیجسن تے جس اتے ستر ہزار فرشتے دردود بھیجسن اوہ جنتیاں وچوں ہوسیں
حضورِ اکرم ص نے فرمایا
میرے اتے تہاڈا درود تہاڈیاں دعاواں لئی راہداری دی رسید بن جاندا اے یعنی درود تہاڈیاں دعاواں دی قبولیت دا ضامن اے
ایہ درود تہاڈے رب دی رضا دا سبب تے تہاڈے عملاں دی زکوٰۃ اے
آپ ص نے ایہ وی فرمایا
تہاڈی دعا تے آسمان دے درمیان حجاب ہوندا اے پر جدوں تسیں محمد وآل محمد علیہم السلام اتے درود پڑھدے ہو تاں اوہ حجاب ولیٹ دتا جاندا اے انج دعا رب دی بارگاہ وچ پہنچ جاندی اے جے کر دعا دے وچ دردود نہ پڑھیا جاوے تاں دعا بلند نہیں ہوندی
حضورِ اکرم ص نے فرمایا
دو فرشتیاں مینوں دسیا
جیہڑا مومن تہاڈی ذات بابرکات اتے اک واری دردود بھیجدا اے خدا اس اتے دس واری رحمت نازل کردا اے تے اس دے دس گناہ وی مٹا دیندا اے
حضورِ اکرم ص نے فرمایا
جمعہ مبارک نوں تسیں میرے اتے زیادہ توں زیادہ درود پڑھیا کرو کیوں جے جمعہ مبارک نوں ہر عمل دا ثواب دگنا ہو جاندا اے
حضور ص نے فرمایا
جمعہ والے دن دردود پڑھ کے میرے لئی رب توں وسیلہ تے درجہ دا سوال کیتا کرو
صحابہ کرام رض نے پچھیا
حضور ص درجہ تے وسیلہ توں کیہ مراد اے ؟
فرمایا
ایہ جنت الفردوس وچ اوہ درجہ اے جس نوں نبی ع توں سوا کوئی نہیں پا سکدا پر مینوں امید اے اوہ درجہ میں پا لواں گا
حضور ص نے فرمایا
مینوں حضرت جبرائیل علیہ السلام نے دسیا
خدا نے فرمایا
جیہڑا تہاڈی ذات بابرکات اتے درود بھیجسیں میں رب اس اتے درود بھیجاں گا تے جیہڑا تہانوں سلام کرسیں میں اس نوں سلام کرساں
حضور ص فرماندے نیں
میں ایہ سن کے رب نوں سجدہ کیتا

حضرت ابو ہریرہ رض روایت کردے نیں
حضور ص نے فرمایا

جیہڑا میری ذات اتے درود لکھسیں جدوں تیک اوہ لکھت باقی رہسیں فرشتے اس اتے درود شریف پڑھدے رہسن

امیر المومنین علی علیہ السلام نے فرمایا
حضورِ اکرم ص اتے دردود بھیجن والے دے گناہواں نوں دردود انج کھا جاندا اے جیویں پانی اگ نوں کھا جاندا
حضورِ اکرم ص اتے دردود بھیجنا غلاماں نوں آزاد کرن توں وی بہتر عمل اے

حضرت امام جعفر الصادق علیہ السلام روایت کردے نیں
حضور ص نے فرمایا
میں قیامت والے دن میزان دے قریب ہوواں گا
جس مومن دے گناہ نیکیاں توں ودھ ہوون گے تاں میں دردود نوں اس دی نیکیاں دے پلڑے وچ رکھ دیساں انج اس دیاں نیکیاں دا پلڑا بھاری کر دیساں

امامِ معصوم ع نے اک مومن نوں ارشاد فرمایا
میں تینوں اوہ عمل دساں جس پاروں خدا تینوں دوزخ دی اگ توں بچا لوے
سنن والے نے فرمائش کیتی
یابن رسول اللہ ص !
ضرور آگاہ فرماؤ
فرمایا
صبح دی نماز توں بعد سو واری درود پاک پڑھیا کر

درود شریف دے اتنے فضائل نیں میں لکھدا رہواں تاں کئی ہزار صفحات دی کتاب بن جاوے
رنگ جھنگ دے قارئین نوں گزارش کردا ہاں حضورِ اکرم ص دی ذاتِ بابرکات اتے درود شریف پڑھنا اپنی زندگی دا معمول بنا لئو ۔۔۔درودِ پاک حضورِ اکرم ص تے اوہناں دی آلِ پاک علیہم السلام نال محبت تے مودت دی دلیل اے
جس کسے نوں ایہ کالم لبھ جاوے اس نوں محفوظ رکھے تاں جے جدوں تیک اوہ لکھت محفوظ رہوے فرشتے میرے اتے دردود پڑھدے رہون

اللهم صل على محمد وال محمد وعجل فرجهم

درود شریف حضورِ اکرم ص تے اوہناں دی آل ع دے نال محبت ، عقیدت ، وفا تے خلوص دا زبان توں اقرار تے اظہار اے ایہ ایہو جیہی عبادت اے جس وچ اللہ تعالیٰ تے فرشتے وی شریک ہو جاندے نیں
اک طالب علم نے پچھیا
درود شریف پڑھن دا فائدہ رسولِ پاک ص نوں اے یا امت نوں؟
آکھیا
دنیا وچ کوئی ذی شعور ایس گل نوں تسلیم نہیں کردا پئی رسولِ خدا ص امت دی طرف ارسال کیتے گئے ثواب دے محتاج نیں !
یقینا درود شریف دا ثواب پڑھن والے نوں ہوندا اے
کئی احادیث وچ وی دردود پڑھن والے نوں دنیا تے آخرت وچ جیہڑا فائدہ ہوندا اے بیان فرمایا گیا اے
درود پاک دعاواں دی قبولیت دا ضامن ہوندا اے
درود پاک گناہواں نوں مٹاندا تے نیکیاں نوں ودھاندا اے
درود پاک مومن نوں حضورِ اکرم ص دا قرب عطا کردا اے
درود پاک پڑھن والے دی زبان تے لب وچوں نکلی ہر دعا قبول ہوندی اے
درود پاک پڑھن والے دے ہونٹاں دے بوسے فرشتے لیندے نیں
درود شریف حضورِ اکرم ص دی معرفت دا سبب بن جاندا اے
درود شریف پڑھن والے دی اکھیاں توں غفلت دے پردے ہٹ جاندے نیں
درود شریف پڑھن والے نوں خواب وچ حضورِ اکرم ص دی زیارت نصیب ہوندی اے
حضورِ اکرم ص نے فرمایا
جس مومن یا مومنہ نے جمعہ والے دن میرے اتے سو واری درود شریف پڑھیا خدا اس دیاں آخرت دیاں سٹھ حاجتاں نوں پورا کرسیں
فیر فرمایا
جیہڑا فجر تے مغرب دی نماز توں بعد سو واری نماز والی تھاں اتے ہور کوئی گل کیتے بناں درود شریف پڑھسیں خدا اس دیاں آخرت دیاں ہور تریوی 23 حاجتاں پوریاں کرسیں
حضرت امام علی رضا علیہ السلام نے فرمایا
جیہڑا بندہ اپنے گناہواں دا کفارہ نہ دے سکدا ہووے اس نوں چاہی دا اے اوہ محمد وآلِ محمد اتے کثرت نال درود بھیجے
ایس لئی کہ اس دی ایہ عبادت گناہواں نوں مٹانے والی اے
حضورِ اکرم ص نے فرمایا
جس شخص میرا ذکر کیتا یا سنیا تے اس میری ذات اتے درود نہ بھیجیا اوہ شقی ( بد بخت/ سنگ دل/ظالم) اے
جس ماہ رمضان نوں پا لیا تے کوئی نیکی نہ کیتی اوہ وی شقی اے تے جس اپنے والدین یا اوہناں وچوں کسے اک نوں پا لیا تے اوہناں نال نیکی نہ کیتی اوہ وی شقی اے
فیر فرمایا
جیہڑا بندہ محمد و آل محمد اتے درود بھیجے خدا اس نوں بہتر شہیداں دا اجر عطا کرسیں تے اوہ گناہواں توں انج پاک ہو جاسیں جیویں اوہ ماں دے پیٹ وچوں ہُن جمیا اے
حضورِ اکرم ص نے فرمایا
جیہڑا بندہ جمعہ دے دن سو واری میری ذات اتے درود بھیجسیں خدا اس دے اسی سالاں دے گناہ معاف فرما دیسیں
حضرت انس بن مالک رض روایت کردے نیں
حضورِ اکرم ص نے فرمایا
جیہڑا مومن جمعہ دے دن میری ذات اتے اک ہزار واری درود بھیجسیں اس دا مقام جنت اے
حضورِ اکرم ص نے ایہ وی فرمایا
جیہڑا میری ذات اتے درود بھیجسیں اس اتے اگ اثر نہ کرسیں
حضورِ اکرم ص ایہ وی فرمایا
کوئی دعا اس وقت تک خدا دی بارگاہ وچ باریاب نہیں ہوندی جتنے تیک درود شریف پڑھ کے دعا شروع نہ کیتی جاوے
اوہ دعا جس دے اول آخر وچ درود شریف پڑھیا جاوے اوہ دعا ضرور قبول ہوندی اے
اک حدیث وچ حضورِ اکرم ص دا ارشاد مبارک اے
جیہڑا بندہ صرف میرے اتے درود بھیجے تے میرے اہلِ بیت علیہم السلام نوں درود وچ شامل نہ کرے تاں اس دے درود تے اسماناں دے وچکار ستر پردے پئے جاسن تے خدا فرماسیں
تیرے لئی کوئی نیکی نہیں تے دعا وی قبول نہیں
فیر خدا ملائکہ نوں ارشاد فرماسیں
جتنے تیک ایہ نبی کریم ص دے نال اوہناں دی عترت (آل ع) نوں شامل نہ کرے اس دی دعا روک دتی جاوے
حضور ص نے فرمایا
اوہ دعا اتنے تیک روک دتی جاندی جتنے تیک درود وچ میرے اہلِ بیت علیہم السلام نوں شامل نہ کیتا جاوے
حضرت امام جعفر صادق علیہ السلام نے فرمایا
جمعہ دی رات نوں تے جمعہ دے دن صدقہ دیونا اک ہزار حسنات دے برابر اے تے جمعہ دی رات نوں تے جمعہ دے دن نوں محمد و آل محمد اتے درود بھیجن دے وی ہزار حسنات نیں
ہزار گناہ جھڑ جاندے نیں تے ہزار درجے بلند ہو جاندے نیں
جمعہ دی رات نوں محمد و آل محمد اتے درود بھیجن نال اسماناں وچ قیامت تیک اک نور پیدا کر دتا جاندا اے
جمعہ دی رات نوں درود شریف بھیجن والے لئی اسماناں دے فرشتے تے اوہ فرشتہ جیہڑا حضورِ اکرم ص دی قبر مبارک دا محافظ اے قیامت تیک اوہدے لئی استغفار کردے رہسن
سبحان الله
اللہم صل علی محمد و آل محمد وعجل فرجہم
جس مومن نوں کسے پریشانی دی وجہ توں نیند نہ آوے تاں اوہ قرآن مجید دی سورت احزاب دی اوہ آیت پڑھے جس وچ درود شریف پڑھن دا حکم اے
جدوں اوہ ایہ آیت پڑھنی شروع کردا اے فرشتے وی درود شریف پڑھن لگ جاندے نیں انج اوہ اس دے اعمال دا ثواب لکھن توں رک جاندے نیں
اوہ فرشتے خدا دی بارگاہ وچ گزارش کردے نیں پئی مومن نوں نیند تے سکون عطا فرما تاں جے اوہ اپنا فرض ادا کرن
درودِ پاک دی فضیلت وچ کئی ہزار صفحات دی کتاب لکھ کے وی ایہو آکھنا پوے گا
درود شریف دی فضیلت نہیں لکھ سکدے
خدا سانوں معرفت عطا فرماوے تاں جے درود شریف ورگے معنوی خزانے دی اہمیت دا ادراک ہوسکے