لانس نائیک محمد محفوظ شہید نشان حیدر کا 53 واں یومِ شہادت

آج (بدھ) لانس نائیک محمد محفوظ شہید نشانِ حیدرکا 53واں یومِ شہادت منایا جارہا ہے۔

ملک بھرکی مساجد میں قرآن خوانی اور دعاؤں کا اہتمام کیا گیا ہے۔

علما کرام نے شہید کے درجات کی سربلندی کے لئے خصوصی دعاؤں کا اہتمام کیاعلما کرام نے اظہارِ خیال کرتے ہوئے کہا کہ؛”شہدا کی عظیم قربانیوں کی بدولت آج ہمارا ملک قائم و دائم ہے” شہید ہمیشہ زندہ ہوتے ہیں، وطن کی حفاظت کی خاطر جانوں کا نذرانہ پیش کرنے والے پاک فوج کے جوان عزت و احترام کے مستحق ہیں اور زندہ قومیں اپنے محسنوں کے احسانات کو فراموش نہیں کرتیں۔

انہوں نے کہا کہ شہدا کا لہو ہم پر قرض ہے، جو قومیں اپنے شہدا کی تکریم نہیں کرتیں وہ ذلیل و رسوا ہو جاتی ہیں۔

لانس نائیک محمد محفوظ شہید دھرتی کا بہادر بیٹا تھا جو ہمیشہ ہر دل میں زندہ رہے گا اور قوم کے شہدا کی قربانیاں ملکی استحکام اور عظمت کی نشانیاں ہوتی ہیں جس پر قوم بجا طور پر فخر کرتی ہے۔

وزیراعظم محمد شہبازشریف نے لانس نائیک محمد محفوظ شہید، نشان حیدرکی آج 53ویں برسی پر انہیں زبردست خراج عقیدت پیش کیا ہے۔

ایک بیان میں انہوں نے کہا کہ لانس نائیک محمد محفوظ شہید نے 1971 کی جنگ میں دشمن کا مقابلہ کرتے ہوئے مثالی جرات اور بہادری کا مظاہرہ کیا۔

وزیراعظم نے کہا کہ یہ محمد محفوظ شہید کی غیر معمولی صلاحیت تھی کہ انہوں نے اقتدار کی دشمن کی بے لگام ہوس کو کچل دیا۔

لانس نائیک محمد محفوظ شہید مادر وطن کے دفاع کے لیے ایک ناقابل تسخیر سیسہ پلائی ہوئی دیوار ثابت ہوئے۔ اپنے ملک کے دفاع کے لیے ان کا جذبہ اور اٹوٹ عزم نئی نسل کے لیے مشعل راہ ہے۔

شہباز شریف نے کہا کہ پوری قوم کو شہدا اور ان کے خاندانوں پر فخر ہے اور ملک کے لیے ان کی قربانیوں کو کبھی فراموش نہیں کریں گے۔