وزیرخزانہ کا غیر ملکی سرمایہ کاروں کو سازگار ماحول فراہم کرنے کے عزم کا اعادہ

وزیرخزانہ محمد اورنگزیب نے کہا ہے کہ حکومت کے اقدامات کے باعث مہنگائی میں بتدریج کمی آرہی ہے۔

انہوں نے یہ بات آج(منگل کو) لاہور میں ویڈیولنک کے ذریعے ”سی پیک کا دوسرا مرحلہ اور ہمارا خطہ” کے موضوع پر ایک سیمینار سے خطاب کرتے ہوئے کہی۔

وزیر خزانہ نے کہا کہ ملک پر سرمایہ کاروں کے اعتماد میں اضافہ ہوا ہے اور پالیسی ریٹ میں کمی آرہی ہے۔

انہوں نے کہا چین پاکستان اقتصادی راہداری کے پہلے مرحلے میں بنیادی ڈھانچے پر توجہ دی گئی اور اب دوسرے مرحلے میں اس سے مستفید ہونے کا سلسلہ شروع ہو گا۔

محمد اورنگزیب نے کہا کہ نجی شعبہ ملک کو معاشی ترقی سے ہمکنار کرنے کی بھرپور صلاحیت رکھتا ہے۔

وزیر خزانہ نے کہا کہ ملک میں غیرملکی سرمایہ کاری میں اضافہ ہو رہا ہے۔

انہوں نے چین اور سعودی عرب کے سرمایہ کاروں کو سازگار ماحول فراہم کرنے کے لئے حکومت کے عزم کا اعادہ کیا اور آئی ایم ایف پروگرام کی کامیابی کی امید ظاہر کی۔