آج قومی اسمبلی کو بتایا گیا کہ پاکستان اور بنگلہ دیش تجارت، سیاحت اور طبی شعبے کے فروغ کیلئے براہ راست پروازوں کی جلد بحالی پر کام کر رہے ہیں۔

وقفہ سوالات کے دوران ایک سوال کے جواب میں پارلیمانی امور کے وزیر ڈاکٹر طارق فضل چوہدری نے کہا کہ بنگلہ دیش نے دو پاکستانی ایئرلائنز فلائی جناح اور ایئر سیال کو دو ممالک کے درمیان پروازیں چلانے کی اجازت دی ہے۔

انہوں نے بتایا کہ دو لاکھ میٹرک ٹن چاول کی برآمد کے لیے مفاہمت کی یادداشت پر دستخط کیے گئے ہیں جس میں سے پچاس ہزار میٹرک ٹن پہلے ہی فراہم کیے جا چکے ہیں۔

ایک اور سوال کے جواب میں پارلیمانی سیکرٹری برائے مواصلات گل اصغر خان نے کہا کہ چھ رویہ سیالکوٹ کھاریاں موٹروے پر کام جاری ہے اور 2028میں مکمل ہونے کی توقع ہے۔

ایک سوال کے جواب میں ڈاکٹر طارق فضل چوہدری نے کہا کہ وزیراعظم شہباز شریف کی ہدایات پر صارفین کو نئے آر ایل این جی گیس کنکشن فراہم کیے جا رہے ہیں۔

انہوں نے کہا کہ آر ایل این جی کی قیمت سوئی گیس سے زیادہ لیکن ایل این جی سے کم ہوگی۔

ایک سوال کے جواب میں پارلیمانی سیکرٹری برائے انسانی حقوق صبا صادق نے ایوان کو آگاہ کیا کہ ٹول فری ہیلپ لائن 1099انسانی حقوق کی خلاف ورزیوں پر مفت قانونی مشورہ اور مدد فراہم کرنے کیلئے چوبیس گھنٹے کام کرتی ہے۔

ایوان کا اجلاس اب پیر کو شام ساڑھے چار بجے ہوگا۔