اقوام متحدہ میں پاکستان کے مستقل مندوب سفیر عاصم افتخار احمد نے سلامتی کونسل میں کولمبیا پر بریفنگ کے دوران کہا ہے کہ پاکستان کولمبیا کے امن عمل میں اقوام متحدہ کے کردار کو سراہتا ہے اور 2016 کے امن معاہدے پر مکمل عملدرآمد کی حمایت جاری رکھے گا۔

انہوں نے دیہی اصلاحات اور سیکیورٹی اقدامات میں پیش رفت کو خوش آئند قرار دیتے ہوئے زور دیا کہ مسلح گروہ تشدد ترک کر کے بغیر شرط مکالمے میں شریک ہوں۔

سفیر نے بعض علاقوں میں سیکیورٹی خدشات اور سماجی رہنمائوں کو درپیش خطرات پر بھی تشویش کا اظہار کیا اور کولمبیا میں پرامن انتخابات کی ضرورت پر زور دیا۔

عاصم افتخار نے کہا کہ پاکستان عالمی امن و سلامتی کے لیے کولمبیا کے ساتھ مستقبل کے تعاون کا منتظر ہے۔ میں آج اس ایوان میں خصوصی دائرہ اختیار برائے امن کے صدر، جناب الیخاندرو رامیلی کی معزز موجودگی کو بھی تسلیم کرنا چاہتا ہوں۔

انہوں نے کہا کہ 2016 کا امن معاہدہ کولمبیا کے لیے تنازع کو مواقع میں بدلنے کا خاکہ فراہم کرتا ہے۔ یہ معاہدہ، دہائیوں پر محیط تنازع کے بنیادی اسباب کا احاطہ کرتے ہوئے، دیہی اصلاحات، انصاف، شمولیت اور مفاہمت کو فروغ دے رہا ہے، اور ایک ایسے مستقبل کی بنیاد رکھ رہا ہے جہاں امن نہ صرف ممکن بلکہ نفع بخش بھی ہو۔

عاصم افتخار نے کہا کہ میں اس بات کا بھی ذکر کرنا چاہتا ہوں کہ ایس آر ایس جی نے صبر و استقامت کو بھی اس تناظر میں اہم خصوصیات کے طور پر اجاگر کیا۔ پاکستان، کولمبیا کی حکومت اور 2016 کے معاہدے کے فریقین کی امن کے لیے مسلسل وابستگی کو سراہتا ہے، جو کہ متعدد چیلنجوں کے باوجود جاری ہے۔

پاکستانی سفیر نے کہا کہ دیہی اصلاحات میں پیش رفت، خاص طور پر زرعی عدلیہ کے قیام سے متعلق قانون سازی، خوش آئند ہے۔ زمین کے حقوق کو مستحکم کرنا اور تنازعات کو حل کرنا مستقبل میں تنازع کے امکانات کو روکنے اور اس شعبے میں حاصل شدہ کامیابیوں کو مستحکم کرنے کے لیے انتہائی اہم ہیں۔

انہوں نے کہا کہ یہ جان کر حوصلہ افزائی ہوئی کہ 95 فیصد سابق جنگجو اپنی انفرادی بحالی کے منصوبے مکمل کر چکے ہیں، تاہم ان کے لیے سیکیورٹی کے خطرات اور بدنامی کا مسئلہ بدستور قائم ہے۔

عاصم افتخار کا مزید کہنا تھا کہ پائیدار بحالی کے لیے رہائش، روزگار اور تحفظ کے اقدامات ناگزیر ہیں تاکہ تشدد کے دائروں کو توڑا جا سکے۔

عاصم افتخار نے کہا کہ ہم کولمبیا میں ایک پرامن اور غیر پرتشدد انتخابی عمل کے مطالبے کی حمایت کرتے ہیں۔ ہم امن اور مفاہمت کے لیے انصاف کی بنیاد پر کام کرنے والے خصوصی دائرہ اختیار برائے امن کی انقلابی کاوشوں کا خاص طور پر اعتراف کرتے ہیں۔

انہوں نے کہا کہ ہم مسلح گروہوں سے مطالبہ کرتے ہیں کہ وہ تشدد کو ترک کریں، مثبت انداز میں بات چیت کریں، بغیر کسی شرط کے مکالمے میں شریک ہوں، اور آئین و قومی قوانین کی مکمل پاسداری کریں۔

پاکستانی سفیر کا کہنا تھا کہ کولمبیا میں پائیدار امن کے لیے جامع مکالمہ، ترقی اور انصاف ضروری ہیں جو کہ قومی ملکیت اور اعتماد پر مبنی ہوں۔ چونکہ کولمبیا انتخابات کی طرف بڑھ رہا ہے، یہ لازم ہے کہ تمام سیاسی عناصر معاہدے کی روح کا احترام کریں اور امن سے وابستگی کا مظاہرہ کریں۔