ڈسٹرکٹ پولیس آفیسر کیپٹن (ر) بلال افتخار کیانی نے تھانہ اٹھارہ ہزاری میں کھلی کچہری کا انعقاد کیا، جس میں شہریوں کی بڑی تعداد نے شرکت کی۔ ڈی پی او نے عوامی مسائل توجہ سے سنے اور متعدد شکایات کے حل کے لیے موقع پر ہی احکامات جاری کیے۔ڈی پی او بلال افتخار کیانی نے اس موقع پر شہریوں سے منشیات فروشی کی موجودہ صورتحال اور ٹاؤٹ مافیا کی مداخلت کے حوالے سے استفسار بھی کیا۔ انہوں نے واضح ہدایت دی کہ منشیات فروشوں کے خلاف جاری کریک ڈاؤن کو مزید مؤثر اور بلا امتیاز انداز میں جاری رکھا جائے۔ان کا کہنا تھا کہ پبلک سروس ڈلیوری میں بہتری پولیس کا اولین فریضہ ہے، اور اس سلسلے میں اٹھائے گئے اصلاحی اقدامات تسلسل کے ساتھ جاری رہیں گے۔ڈی پی او نے کہا کہ شہریوں کے مسائل کو ترجیحی بنیادوں پر حل کیا جا رہا ہے، تاکہ عوام کو فوری اور شفاف انصاف کی فراہمی یقینی بنائی جا سکے۔آخر میں انہوں نے کہا کہ پولیس خدمتِ خلق کا ادارہ ہے، اس کے دروازے عوام کے لیے چوبیس گھنٹے کھلے ہیں