نائب وزیراعظم اسحاق ڈار نے ایران کے وزیر خارجہ سید عباس عراقچی سے ٹیلی فون پر گفتگو کی جس میں خطے کی موجودہ صورتحال اور باہمی دلچسپی کے امور پر تبادلہ خیال کیا گیا۔

ٹیلی فونک گفتگو کے دوران عباس عراقچی نے خطے کی موجودہ صورتحال پر شدید تشویش کا اظہار کیا جس میں اسرائیل کی طرف سے لبنان میں جنگ بندی کی خلاف ورزیوں اور بیروت کے کچھ حصوں میں ممکنہ حملے کے حوالے سے اسرائیلی حکومت کے احکامات شامل ہیں۔

ایران کے وزیر خارجہ نے علاقائی سفارت کاری میں پاکستان کے تعمیری کردار کو بھی سراہا اور پاکستان سے درخواست کی کہ وہ موجودہ صورتحال میں کشیدگی میں کمی اور جنگ بندی کو برقرار رکھنے کی کوششوں میں مدد کے لیے اپنے اچھے تعلقات بروئے کار لائے۔

نائب وزیر اعظم اسحاق ڈار نے پاکستان کی شدید تشویش سے آگاہ کیا اور موجودہ مفاہمت کے کسی بھی خلاف ورزی کو روکنے کے لیے جنگ بندی کو برقرار رکھنے کو یقینی بنانے کی اہمیت پر زور دیا۔