حکومتِ پنجاب نے صوبے بھر میں گرمیوں کے طویل دنوں اور بڑھتے ہوئے درجہ حرارت کے پیشِ نظر ایندھن کی بچت اور اضافی کفایت شعاری اقدامات کے تحت تمام تجارتی و کاروباری مراکز کے لیے بندش کے نئے اوقاتِ کار کا اعلان کر دیا ہے۔ چیف سکریٹری پنجاب کی جانب سے جاری کردہ اس باقاعدہ نوٹیفکیشن کا اطلاق ہفتے کے تمام دنوں (بشمول ہفتہ اور اتوار) پر فوری طور پر ہوگا اور یہ احکامات اگلے حکمِ ثانی تک نافذ العمل رہیں گے۔

سرکاری اعلامیے کے مطابق صوبے بھر میں تمام دکانیں، مارکیٹیں، شاپنگ مالز، بازار، ڈیپارٹمنٹل اسٹورز، گروسری اور جنرل و کریانہ اسٹورز رات 9:00 بجے لازمی بند کر دیے جائیں گے۔ اسی طرح تمام شادی ہالز، مارکیز اور دیگر تجارتی مقامات جہاں تقریبات منعقد کی جاتی ہیں، ان کے لیے بندش کا وقت رات 10:00 بجے مقرر کیا گیا ہے۔ نوٹیفکیشن میں مزید بتایا گیا ہے کہ تمام ریسٹورنٹس، کیفے، سینما ہالز، کھانے پینے کے دیگر آؤٹ لیٹس اور پھلوں و سبزیوں کی انفرادی دکانیں رات 11:00 بجے تک بند کرنا ہوں گی، تاہم ریسٹورنٹس سے کھانا ساتھ لے جانے (Takeaway) اور ہوم ڈیلیوری کی سروسز کو اس وقت کی پابندی سے مکمل استثنیٰ حاصل ہوگا۔

دوسری جانب عوام کی سہولت اور ناگزیر خدمات کے تسلسل کو برقرار رکھنے کے لیے متعدد شعبوں کو ان اوقاتِ کار سے مبرّا قرار دیا گیا ہے۔ مستثنیٰ ہونے والے شعبوں میں تمام فارمیسیز، میڈیکل اسٹورز، ہسپتال، کلینکس اور میڈیکل لیبارٹریاں شامل ہیں۔ ان کے ساتھ ساتھ پٹرول و سی این جی پمپس، الیکٹرک وہیکل چارجنگ اسٹیشنز، آئی ٹی کمپنیاں، کال سینٹرز، جم، اسپورٹس فیسیلیٹیز اور انفرادی طور پر قائم بیکریاں، تندور اور دودھ دہی کی دکانیں بھی اس پابندی سے آزاد ہوں گی۔ حکومتِ پنجاب نے اس فیصلے پر سختی سے عمل درآمد یقینی بنانے کے لیے انسپکٹر جنرل آف پولیس (IGP)، تمام ڈویژنل کمشنرز، ڈپٹی کمشنرز اور انتظامی سیکرٹریز کو ہدایات جاری کر دی ہیں۔