سیف سٹی جھنگ کے پینک بٹن کے ذریعے گمشدہ بچے کی بحفاظت اہلِ خانہ سے بازیابی، شہری کو فوری پولیس معاونت فراہم

جھنگ : پنجاب سیف سٹیز اتھارٹی کی جدید ٹیکنالوجی اور فوری رسپانس کے باعث جھنگ میں گمشدہ بچے کو بحفاظت اہلِ خانہ سے ملا دیا گیا۔ موبائل فون نہ ہونے کے باوجود پینک بٹن سروس شہری کے لیے پولیس سے رابطے کا مؤثر ذریعہ بنی۔
بلال حبشی چوک جھنگ میں شہری عون اویس کا بھانجا گم ہو گیا۔ موبائل فون دستیاب نہ ہونے پر شہری نے پینک بٹن کے ذریعے پولیس ہیلپ لائن 15 پر اطلاع دی اور مدد طلب کی۔
اطلاع موصول ہوتے ہی سیف سٹی جھنگ نے فوری کارروائی کرتے ہوئے معاملے کو ٹریس کیا۔ بروقت پولیس رسپانس اور مؤثر رابطہ کاری کے نتیجے میں گمشدہ بچے کو بحفاظت اہلِ خانہ سے ملا دیا گیا اور پی پی آئی سی 3 جھنگ میں شہری عون اویس کے حوالے کر دیا گیا۔
پینک بٹن سروس شہریوں کو ہنگامی حالات میں پولیس سے رابطے کا ایک مؤثر ذریعہ فراہم کرتی ہے، خصوصاً ایسے وقت میں جب موبائل فون دستیاب نہ ہو۔ سیف سٹی جھنگ جدید ٹیکنالوجی کے مؤثر استعمال کے ذریعے شہریوں کے تحفظ اور فوری پولیس معاونت کے لیے سرگرمِ عمل ہے۔