دفتر خارجہ کی ترجمان نے بنگلہ دیش کے حالیہ واقعات میں پاکستان کے ملوث ہونے سے متعلق بھارتی الزامات کو مسترد کردیا ہے۔

ترجمان ممتاز زہرہ بلوچ نے آج (جمعہ) اسلام آباد میں ذرائع ابلاغ کو اپنی ہفتہ وار بریفنگ میں ایک سوال کے جواب میں کہا کہ یہ بیانات بھارت کی پاکستان سے تشویشناک مخاصمت کے عکاس ہیں۔

انہوں نے کہا بھارتی سیاسی رہنما اور ان کے ذرائع ابلاغ اپنی داخلی اور خارجہ پالیسی میں ناکامی کا الزام پاکستان پر لگانے کے عادی ہیں۔

ترجمان نے کہا پاکستان اور بنگلہ دیش کے درمیان مثبت روابط ہیں جو گزشتہ کئی سال سے مضبوط تر ہورہے ہیں۔

انہوں نے کہا کہ حکومتِ پاکستان اور عوام نے بنگلہ دیش کے عوام کے ساتھ اپنی حمایت اور یکجہتی کا اظہار کیا ہے،ہم حالات کے پرُامن ہونے اور معمول پر آنے کے لئے مخلصانہ طور پر پُرامید ہیں۔

ممتاز زہرہ بلوچ نے کہا ہمیں یقین ہے کہ بنگلہ دیش کے عوام کا جذبہ اور اتحاد ایک ہم آہنگ مستقبل کی طرف گامزن ہوگا۔

ایک اور سوال کے جواب میں ترجمان نے کہا کہ پاکستان کے ہائی کمشنر نے بنگلہ دیش کے نئے وزیر اعظم کی تقریب حلف برداری میں شرکت کی۔