ضلع جھنگ کی تحصیل شورکوٹ میں زمین کے تنازع پر دو خاندانوں کے درمیان ہونے والے جھگڑے کے نتیجے میں دو افراد زخمی ہو گئے، جنہیں ریسکیو 1122 کے عملے نے فوری طبی امداد فراہم کرتے ہوئے تحصیل ہیڈ کوارٹر ہسپتال شورکوٹ منتقل کر دیا۔
تفصیلات کے مطابق ریسکیو 1122 کے کنٹرول روم کو اطلاع موصول ہوئی کہ بستی اسلام دبکلاں روڈ شورکوٹ میں زمین کے معاملے پر دو گروپوں کے درمیان جھگڑا ہو گیا ہے جس کے نتیجے میں افراد زخمی ہو گئے ہیں۔ اطلاع ملتے ہی ریسکیو کنٹرول روم نے قریبی ایمبولینس کو فوری طور پر جائے وقوعہ کی جانب روانہ کیا۔
ریسکیو ٹیم نے موقع پر پہنچ کر زخمیوں کو ابتدائی طبی امداد فراہم کی۔ زخمیوں میں 65 سالہ رب نواز ولد نور محمد اور 30 سالہ فخر ولد رب نواز شامل ہیں۔ بعد ازاں دونوں کو مزید علاج کے لیے تحصیل ہیڈ کوارٹر ہسپتال شورکوٹ منتقل کر دیا گیا۔