جھنگ: ڈی پی او ساجد حسین کی زیرِ صدارت ٹریفک پولیس اجلاس، ٹریفک کی روانی بہتر بنانے، حادثات کی روک تھام اور کرپشن میں ملوث اہلکاروں کے سخت احتساب کی ہدایت

جھنگ: ڈسٹرکٹ پولیس آفیسر جھنگ ساجد حسین کی زیرِ صدارت ٹریفک پولیس اسٹاف کا اجلاس منعقد ہوا، جس میں شہر کی ٹریفک صورتحال، مصروف شاہراہوں، چالاننگ کی شرح اور اہلکاروں کی کارکردگی کا تفصیلی جائزہ لیا گیا۔ اجلاس میں ڈسٹرکٹ ٹریفک آفیسر مسعود احمد اور ڈی ایس پی پٹرولنگ جاوید احمد بھی موجود تھے۔

اجلاس کے دوران ٹریفک کی روانی بہتر بنانے، نظم و ضبط برقرار رکھنے اور حادثات کی روک تھام کے لیے مؤثر اقدامات کرنے پر زور دیا گیا۔ ڈی پی او ساجد حسین نے ہدایت کی کہ شہر کے اہم ٹریفک پوائنٹس اور مصروف شاہراہوں پر ٹریفک کی صورتحال کے مطابق اضافی نفری تعینات کی جائے، ٹریفک قوانین پر سختی سے عمل درآمد یقینی بنایا جائے اور پٹرولنگ کو مؤثر بنایا جائے۔

ڈی پی او نے واضح کیا کہ کرپشن کے معاملے میں زیرو ٹالرینس پالیسی پر عمل کیا جائے گا اور بدعنوانی میں ملوث اہلکاروں کا سخت احتساب یقینی بنایا جائے گا۔ انہوں نے دورانِ ڈیوٹی شہریوں کے ساتھ خوش اخلاقی، تعاون اور ذمہ دارانہ رویہ اپنانے کی ہدایت کرتے ہوئے کہا کہ ٹریفک پولیس عوام کو سہولت فراہم کرنے کے لیے اپنی ذمہ داریاں مؤثر انداز میں انجام دے۔

اجلاس میں ٹریفک اسٹاف کو درپیش مسائل کا بھی جائزہ لیا گیا اور ان کے فوری حل کے لیے ضروری احکامات جاری کیے گئے۔ ڈی پی او نے ٹریفک ایجوکیشن یونٹ کو ہدایت کی کہ شہریوں میں ٹریفک قوانین سے متعلق آگاہی بڑھانے کے لیے مؤثر کردار ادا کیا جائے تاکہ ٹریفک کی روانی بہتر بنانے اور حادثات میں کمی لانے میں مدد مل سکے۔