وزیراعظم شہبازشریف نے آسٹریا کی کمپنیوں کو پاکستانی کاروباری اداروں سے ملکر زراعت، فوڈپراسیسنگ، چمڑے، ٹیکسٹائل اور انجینئرنگ سمیت مختلف شعبوں میں تعاون کی نئی راہیں تلاش کرنے کی دعوت دی ہے۔

انہوں نے یہ بات آج(پیر) کو ویانا میں پاکستان آسٹریا بزنس فورم سے خطاب کرتے ہوئے کہی۔

وزیراعظم نے کہا آسٹریا کے انجینئرنگ، قابل تجدید توانائی، موسمیاتی ٹیکنالوجی اور جدید صنعت کے عالمی سطح کے ماہرین پاکستان کی ترقی پذیر معیشت سے استفادہ کرسکتے ہیں۔

انہوں نے کہا کہ پن بجلی، شمسی ٹیکنالوجی، بائیوماس اور جدید گرڈ سلوشنز میں آسٹریا کی قیادت کے اقدامات پاکستان کے عزائم سے بالکل ہم آہنگ ہیں۔

شہبازشریف نے کہا پاکستان کی آبادی کا ساٹھ فیصد نوجوانوں پر مشتمل ہے انہوں نے کہا عالمی معیار کی اعلیٰ تربیت یافتہ افرادی قوت کے ساتھ پاکستان یورپی ممالک کی تربیت یافتہ کارکنوں کی ضرورت پوری کرسکتا ہے۔