وزیراعظم شہباز شریف نے متعلقہ حکام کو ہدایت کی ہے کہ وہ عوام کو بغیر کسی پریشانی کے پیٹرول سبسڈی کی باوقار فراہمی یقینی بنائیں۔

ایک بیان میں انہوں نے مستحقین کا دائرہ کار بڑھانے کی ہدایت بھی کی۔

ملک بھر سے موصول ہونے والی آرا کی بنیاد پر وزیراعظم شہباز شریف نے ایک اور اہم فیصلہ کیا ہے۔ اب پانچ لیٹر سے کم پیٹرول ڈلوانے والی موٹر سائیکلیں، چنگ چی اور آٹو رکشوں کو ہر ہفتے ایک ٹوکن پر پانچ سو روپے کی رعایت ملے گی۔ ہر ہفتے ایک اور ماہانہ چار ٹوکن جاری کیے جائیں گے۔

ادھر آٹھ سو سی سی تک کی گاڑیاں استعمال کرنے والے افراد کو موجودہ طریقہ کار کے مطابق ہر دس دن میں دس لیٹر تک پٹرول پر ایک سو روپے فی لیٹر کی رعایت ملتی رہے گی۔ ماہانہ دس لیٹر پٹرول کے لیے تین ٹوکن جاری کرنے کا سلسلہ بھی جاری رہے گا۔

اس سے قبل وزیراعظم شہباز شریف نے اسکیم سے فائدہ اٹھانے کے اہل شہریوں کے لیے رجسٹریشن کی ایس ایم ایس سروس مکمل طور پر مفت کرنے کا اعلان کیا تھا۔