وزیراعظم شہباز شریف کی ہدایت پر حکومت نے روشن ڈیجیٹل اکائونٹ سکیم کو غیر ملکی شہریوں اور ادارہ جاتی سرمایہ کاروں تک وسعت دینے کا فیصلہ کیا ہے۔

اس بات کا اعلان وزیر خزانہ محمد اورنگزیب نے ایک بیان میں کیا۔

فیصلے کے تحت غیر ملکی شہری، کمپنیاں اور ادارہ جاتی سرمایہ کار نہ صرف روشن ڈیجیٹل اکاونٹس کھول سکیں گے بلکہ سرکاری سکیورٹیز اور نیا پاکستان سرٹیفکیٹس میں سرمایہ کاری بھی کرسکیں گے جس سے انہیں پرکشش منافع حاصل ہوگا۔

وزیر خزانہ نے کہا کہ اس اقدام سے سرمایہ کاری کیلئے پرکشش ملک کے طور پر پاکستان کا تشخص مزید بڑھے گا اور ملک کی مالیاتی منڈیوں کو مزید وسعت دینے میں مدد ملے گی۔

انہوں نے دنیا بھر کے سرمایہ کاروں کو پاکستان میں موجود پر کشش مواقع سے استفادہ کرنے اور ملک کے معاشی مستقبل میں شراکت دار بننے کی دعوت دی۔