وزیراعظم شہباز شریف نے ایرانی قیادت کو یقین دلایا ہے کہ پاکستان خطے میں قیام امن کے لیے تعمیری کردار ادا کرتا رہے گا۔

انہوں نے ان خیالات کا اظہار ایران کے صدر ڈاکٹر مسعود پزشکیان کے ساتھ ٹیلی فون پر گفتگو کرتے ہوئے کیا۔

شہباز شریف نے خلیجی خطے میں جاری خطرناک جنگ پر گہری تشویش ظاہر کی۔

اس سنگین صورتحال کے پیش نظر، وزیراعظم نے کشیدگی کم کرنے اور تمام ہمسایہ ممالک کے درمیان اختلافات کو حل کرنے کے لیے مذاکرات اور سفارت کاری کی طرف واپسی کے لیے مل کر کام کرنے کی فوری ضرورت پر زور دیا۔

انہوں نے امت مسلمہ کی صفوں میں اتحاد کی اہمیت پر زور دیتے ہوئے کہا کہ اس کی پہلے سے کہیں زیادہ ضرورت ہے۔

وزیراعظم نے جاری جنگ کے پیش نظر بہادر ایرانی عوام کے ساتھ پاکستان کی یکجہتی کا اظہار کیا۔

انہوں نے قیمتی جانوں کے نقصان پر گہرے رنج و غم کا اظہار کیا اور زخمیوں کی جلد صحت یابی اور بے گھر افراد کے تحفظ کے لیے دعا کی۔