ڈپٹی کمشنر جھنگ، علی اکبر بھنڈر نے آج پنجاب ایمرجنسی سروس ریسکیو 1122 کے سینٹرل اسٹیشن کا خصوصی دورہ کیا۔ اُن کی آمد پر ڈسٹرکٹ ایمرجنسی آفیسر ڈاکٹر میاں محمد اشفاق اور ایمرجنسی آفیسر طاہر عباس نے اُن کا پرتپاک استقبال کیا اور پھولوں کا گلدستہ پیش کیا۔

دورے کے دوران ڈپٹی کمشنر کو فلڈ سیزن کے پیشِ نظر لگائے گئے خصوصی سٹال کا معائنہ کروایا گیا، جہاں واٹر ریسکیو ایکوئپمنٹ کی تفصیلی بریفنگ دی گئی۔ انہوں نے اسٹیشن کی مجموعی صورتحال، دستیاب وسائل اور ریسکیو ٹیموں کی تیاریوں کا بھی بغور جائزہ لیا۔

علی اکبر بھنڈر نے ریسکیو 1122 کے کنٹرول روم، کال مانیٹرنگ سسٹم، دفاتر، اسٹور رومز اور دیگر اہم شعبہ جات کا بھی دورہ کیا اور دستیاب سہولیات و نظم و نسق کو سراہا۔

ڈپٹی کمشنر نے ریسکیو سٹاف کی فلڈ ایمرجنسی کے لیے کی گئی تیاریوں، پیشہ ورانہ مہارت، اور جذبہ خدمت کو خراج تحسین پیش کیا۔ انہوں نے خصوصی طور پر ڈسٹرکٹ ایمرجنسی آفیسر ڈاکٹر میاں محمد اشفاق ،ایمرجنسی آفیسر طاہر عباس اور ان کی ٹیم کی کارکردگی کو سراہتے ہوئے کہا کہ “ریسکیو اہلکار ہر ممکن چیلنج سے نمٹنے کے لیے تیار ہیں اور ان کی تیاری قابلِ تعریف ہے۔