جھنگ میں 6 محرم الحرام کا مرکزی علم و ذوالجناح جلوس پُرامن اختتام پذیر، ضلع بھر میں 28 جلوس اور 222 مجالس کے لیے سخت سیکیورٹی انتظامات

ضلع جھنگ میں 6 محرم الحرام کے موقع پر علم اور ذوالجناح کا مرکزی جلوس محلہ ٹاہلیانوالہ سے برآمد ہوا جو اپنے مقررہ راستوں سے گزرتا ہوا نماز مغرب سے قبل گلی ظہور شاہ پہنچ کر پُرامن طور پر اختتام پذیر ہوگیا۔ جلوس کے دوران عزاداروں کی بڑی تعداد نے شرکت کی جبکہ انتظامیہ اور قانون نافذ کرنے والے ادارے سیکیورٹی کے فرائض سرانجام دیتے رہے۔

ضلعی انتظامیہ کے مطابق 6 محرم الحرام کے موقع پر ضلع بھر میں مجموعی طور پر 28 جلوس برآمد ہوں گے جبکہ 222 مجالس عزا منعقد کی جائیں گی۔ محرم الحرام کے اجتماعات کے پُرامن انعقاد کے لیے سیکیورٹی اور انتظامی اقدامات کو مزید مؤثر بنایا گیا ہے۔

حساسیت کے اعتبار سے جلوسوں کی درجہ بندی کرتے ہوئے 6 جلوسوں کو کیٹیگری “اے”، 7 کو “بی” اور 15 کو “سی” کیٹیگری میں شامل کیا گیا ہے۔ اسی طرح مجالس کے حوالے سے 21 مجالس “اے”، 62 “بی” جبکہ 139 مجالس “سی” کیٹیگری میں شمار کی گئی ہیں۔

محرم الحرام کے جلوسوں اور مجالس کی سیکیورٹی یقینی بنانے کے لیے پولیس، ایلیٹ فورس اور دیگر قانون نافذ کرنے والے اداروں کے مجموعی طور پر 583 اہلکار تعینات کیے گئے ہیں، جو جلوسوں کے راستوں، امام بارگاہوں اور مجالس کے مقامات پر ڈیوٹی سرانجام دیں گے۔

ضلعی انتظامیہ اور پولیس حکام کا کہنا ہے کہ امن و امان کے قیام، بین المسالک ہم آہنگی اور عزاداروں کے تحفظ کو یقینی بنانے کے لیے تمام ضروری اقدامات مکمل کر لیے گئے ہیں۔ جلوسوں کے راستوں کی نگرانی، داخلی و خارجی راستوں کی چیکنگ اور مشکوک سرگرمیوں پر کڑی نظر رکھی جا رہی ہے۔

انتظامیہ نے شہریوں سے اپیل کی ہے کہ وہ محرم الحرام کے دوران قانون نافذ کرنے والے اداروں کے ساتھ تعاون کریں اور کسی بھی مشکوک صورتحال کی فوری اطلاع متعلقہ حکام کو دیں تاکہ ضلع بھر میں امن و امان کی فضا برقرار رکھی جا سکے۔