وزیراعظم شہباز شریف کا شام کی خودمختاری، اتحاد اور علاقائی سالمیت کے لیے حمایت کا اعادہ

وزیراعظم محمد شہباز شریف نے نیویارک میں اقوام متحدہ کی جنرل اسمبلی کے 81ویں اجلاس کے موقع پر صدرِ شامی عرب جمہوریہ احمد الشرع سے ملاقات کی۔

وزیراعظم نے شام کے ساتھ پاکستان کے تاریخی اور برادرانہ تعلقات کے عزم کا اعادہ کیا۔ انہوں نے شام کی خودمختاری، اتحاد، علاقائی سالمیت اور سیاسی آزادی کے لیے پاکستان کی حمایت کا یقین دلاتے ہوئے شامی عوام کے لیے قومی استحکام، قومی یکجہتی، امن اور معاشی بحالی کی نیک خواہشات کا اظہار کیا۔

دونوں رہنماؤں نے دوطرفہ تعلقات کو مزید مستحکم کرنے پر تبادلہ خیال کیا، جس میں اعلیٰ سطحی روابط کے فروغ، ادارہ جاتی طریقۂ کار کو فعال بنانے اور تجارت و سرمایہ کاری، تعلیم، انفارمیشن ٹیکنالوجی اور باہمی دلچسپی کے دیگر شعبوں میں مؤثر تعاون شامل ہے۔

وزیراعظم نے شام کی تعمیرِ نو اور معاشی بحالی میں کردار ادا کرنے کے لیے پاکستان کے عملی تعاون کی خواہش کا اظہار کیا۔ وزیراعظم نے شام کی خودمختاری اور علاقائی سالمیت کے لیے پاکستان کی اصولی حمایت واضح کرتے ہوئے خطے میں امن و استحکام کے فروغ کے لیے مکالمے، سفارت کاری اور اقوام متحدہ کے منشور کے اصولوں کے احترام کی اہمیت پر زور دیا۔

دونوں رہنماؤں نے علاقائی صورتحال پر بھی تبادلۂ خیال کیا۔ وزیراعظم نے فلسطینی عوام کے حقِ خودارادیت اور اقوام متحدہ کی متعلقہ قراردادوں اور بین الاقوامی قانون کے مطابق مسئلۂ فلسطین کے منصفانہ اور پائیدار حل کے لیے پاکستان کی مستقل حمایت کی تجدید کی۔

ملاقات میں پاکستان اور شام کے درمیان دیرینہ دوستانہ تعلقات کی تجدیدِ عہد کے ساتھ ساتھ آنے والے برسوں میں دوطرفہ تعاون کو مزید فروغ دینے کے عزم کا بھی اظہار کیا گیا۔