پولیس نے جدید ٹیکنالوجی اور مؤثر ٹریسنگ سسٹم کے ذریعے گزشتہ دو ماہ کے دوران 133 مسروقہ موبائل فونز برآمد کر لئے۔ ڈسٹرکٹ پولیس آفیسر جھنگ کیپٹن (ر) بلال افتخار کیانی نے تقریب کے دوران 46 لاکھ روپے مالیت کے برآمد شدہ موبائل فونز اصل مالکان کے سپرد کئے، تفصیلات کے مطابق ڈی پی او آفس میں موبائل فونز کی تقسیم کے حوالے سے ایک تقریب منعقد ہوئی۔جس میں گزشتہ دو ماہ کے دوران برآمد ہونے والے مسروقہ موبائل فونز شہریوں کے حوالے کئے گئے۔اس موقع پر ڈی پی او بلال افتخار کیانی نے شہریوں کو “ای۔گیجٹ” ایپ کے استعمال کی ہدایت کرتے ہوئے کہا کہ استعمال شدہ موبائل فون خریدنے سے پہلے ای۔گیجٹ پر اس کی تصدیق ضرور کر لیں، تاکہ کسی بھی قسم کی پریشانی سے بچا جا سکے۔انہوں نے مزید کہا کہ شہریوں کے جان و مال کا تحفظ پولیس کی اولین ترجیح ہے اور جدید وسائل کے مؤثر استعمال سے جرائم کے سدباب کے لیے کوششیں مسلسل جاری رہیں گی۔برآمد شدہ موبائل فونز کی واپسی پر شہریوں نے جھنگ پولیس کی کارکردگی کو سراہتے ہوئے ڈی پی او اور آئی ٹی ٹیم کے اقدامات کی تعریف کی۔