پنجاب ایمرجنسی سروس (ریسکیو 1122) کے زیرِ انتظام جھنگ کے ٹاؤن اسٹیشن حویلی بہادر شاہ کا باقاعدہ افتتاح آج بروز بدھ، 22 اپریل 2026 کو مہمانانِ خصوصی ڈپٹی کمشنر جھنگ جناب علی اکبر بھنڈر اور ممبر صوبائی اسمبلی پنجاب کرنل (ریٹائرڈ) غضنفر قریشی کی موجودگی میں کیا گیا۔ اس موقع پر ریسکیو 1122 کے چاق و چوبند دستے نے مہمانوں کو سلامی پیش کی۔
نئے اسٹیشن کے قیام سے حویلی بہادر شاہ اور گردونواح کے علاقوں میں ایمرجنسی خدمات کی فراہمی مزید مؤثر اور تیز ہو جائے گی، جس سے مقامی آبادی کو بروقت امداد میسر آئے گی۔
ڈپٹی کمشنر جھنگ جناب علی اکبر بھنڈر نے تقریب سے خطاب کرتے ہوئے کہا کہ
“ریسکیو 1122 کی خدمات پنجاب بھر میں عوام کے لیے ایک مثالی حیثیت رکھتی ہیں۔ حویلی بہادر شاہ میں اس نئے اسٹیشن کے قیام سے شہریوں کو فوری اور معیاری ایمرجنسی سہولیات فراہم ہوں گی۔ ہماری کوشش ہے کہ ہر فرد کو ہنگامی حالات میں بروقت مدد حاصل ہو۔”
ممبر صوبائی اسمبلی پنجاب کرنل (ر) غضنفر قریشی نے اپنے خطاب میں کہا کہ
“جس طرح ریسکیو 1122 دیگر علاقوں میں عوام کی جان و مال کے تحفظ کے لیے بھرپور خدمات انجام دے رہا ہے، اسی طرح یہ ادارہ حویلی بہادر شاہ میں بھی اہم کردار ادا کرے گا۔ اس اسٹیشن کے قیام سے ایمرجنسی ردعمل کی رفتار میں نمایاں بہتری آئے گی۔”
اس موقع پر ڈسٹرکٹ ایمرجنسی آفیسر سلطان محمود نے خطاب کرتے ہوئے کہا کہ
“ریسکیو 1122 کا مشن ہر ایمرجنسی میں فوری اور مؤثر ردعمل فراہم کرنا ہے، تاہم عوامی شعور اور تعاون اس عمل کو مزید مؤثر بناتے ہیں۔”
نئے اسٹیشن کے ذریعے ریسکیو 1122 جھنگ کی ٹیم حویلی بہادر شاہ اور ملحقہ دیہات و قصبات میں ہنگامی طبی امداد، آگ بجھانے اور دیگر ریسکیو آپریشنز کی سہولیات فراہم کرے گی۔
تقریب کے اختتام پر مہمانانِ خصوصی نے اسٹیشن کے اہلکاروں سے ملاقات کی، ان کی خدمات کو سراہا اور عوام سے اپیل کی کہ وہ ایمرجنسی کی صورت میں ریسکیو 1122 سے فوری رابطہ کریں اور ادارے کے ساتھ بھرپور تعاون کریں۔