شہریوں پر مبینہ تشدد اور رشوت ستانی کے معاملے پر ڈی پی او جھنگ ساجد حسین نے فوری اور سخت نوٹس لیتے ہوئے تھانہ قادرپور کے ایس ایچ او انسپکٹر نوید احمد، محرر چوکی نبر شہید کانسٹیبل محمد شکیل اور کانسٹیبل ظہیر احمد کو معطل کر دیا۔

ڈی پی او نے واقعے کی شفاف تحقیقات کے لیے ڈی ایس پی صدر سرکل ظہور احمد مگسی کو انکوائری رپورٹ فوری طور پر پیش کرنے کا حکم بھی جاری کر دیا ہے۔ اس موقع پر ڈی پی او ساجد حسین کا کہنا تھا کہ پولیس اہلکار قانون سے بالاتر نہیں، اگر محافظ ہی خطا کرے گا تو قانون اس کا بھی احتساب کرے گا۔

انہوں نے کہا کہ کسی شہری کی عزتِ نفس مجروح کرنا ہرگز پولیسنگ نہیں بلکہ کردار کی شکست ہے، جبکہ ذاتی منفعت کے لیے اختیارات کا ناجائز استعمال کسی صورت برداشت نہیں کیا جائے گا۔ ڈی پی او نے واضح کیا کہ انصاف جھنگ پولیس کی پہچان ہے اور جو اس پہچان کو داغدار کرے گا، اسے نشانِ عبرت بنایا جائے گا۔