مون سون کے چوتھے اسپیل کے دوران جھنگ شہر اور گردونواح کے مختلف علاقوں میں بارش کے بعد واسا کا عملہ متحرک ہو گیا۔ بارش کے باعث نشیبی علاقوں اور اہم شاہراہوں پر جمع ہونے والے پانی کی فوری نکاسی کے لیے واسا کا آپریشن ونگ رات گئے تک فیلڈ میں موجود ہے اور نکاسی آب کے لئے متحرک ہے۔

ترجمان واسا کے مطابق منیجنگ ڈائریکٹر کی ہدایات پر عمل کرتے ہوئے عملہ، مشینری اور فیلڈ سٹاف مختلف مقامات پر بارش کے پانی کی نکاسی میں مصروف رہا تاکہ شہریوں کو آمدورفت میں مشکلات کا سامنا نہ کرنا پڑے۔ ڈسپوزل اسٹیشنز کو مکمل فعال رکھا گیا جبکہ نکاسی آب کے عمل کی مسلسل نگرانی بھی کی جا رہی ہے۔

واسا حکام کا کہنا ہے کہ بارش کے دوران اور اس کے بعد تمام متعلقہ افسران و اہلکار ہائی الرٹ رہے اور شہر کے مختلف نشیبی علاقوں میں جمع ہونے والے پانی کو جلد از جلد نکالنے کے لیے تمام دستیاب وسائل بروئے کار لائے جا رہے ہیں ۔

شہریوں نے امید ظاہر کی ہے کہ مون سون کے باقی اسپیلز کے دوران بھی واسا اسی طرح بروقت اقدامات جاری رکھے گا تاکہ بارش کے باعث شہری زندگی معمول کے مطابق برقرار رہ سکے۔
:::