پاکستان خطے میں کشیدگی میں فوری کمی کے لیے خلوص نیت اور واضح مقاصد کے تحت روابط قائم کرنے کیلئے اصولی اور فعال کردار ادا کرتا رہے گا۔

یہ بات وزارت خارجہ کے ترجمان طاہر اندرابی نے آج(جمعرات) کو اسلام آباد میں اپنی ہفتہ وار میڈیا بریفنگ میں کہی۔

ترجمان نے کہا کہ ہم متعلقہ علاقائی فریقوں اور دیگر ممالک کے ساتھ فعال اور تعمیری انداز میں مصروف عمل ہیں، پاکستان کشیدگی میں کمی، جارحیت کے خاتمے اور تنازعات کے پرامن حل کیلئے جامع اقدامات کا حامی ہے۔

طاہر اندرابی نے کہا کہ وزیراعظم شہباز شریف تمام متعلقہ فریقوں کے درمیان بات چیت اور افہام و تفہیم کو فروغ دینے کے لیے ہماری سفارتی کوششوں کی قیادت ذاتی طور پر کر رہے ہیں۔

ترجمان نے کہا کہ نائب وزیراعظم اسحاق ڈار بھی ان کوششوں کو آگے بڑھانے کے لیے خطے اور اس سے باہر اپنے ہم منصبوں کے ساتھ قریبی اور مسلسل مضبوط روابط برقرار رکھے ہوئے ہیں۔

انہوں نے تمام میڈیا پلیٹ فارمز پر زور دیا کہ وہ ذمہ داری کا مظاہرہ کرتے ہوئے قیاس آرائیوں سے گریز کریں اور درست، بروقت معلومات کے لیے مکمل طور پر سرکاری ذرائع پر انحصار کریں۔