ڈسٹرکٹ پولیس آفیسر ساجد حسین کی زیرِ صدارت ایک اہم کرائم میٹنگ کا انعقاد ہوا، جس میں ضلع بھر کے ایس ڈی پی اوز، ایس ایچ اوز اور دیگر پولیس افسران نے شرکت کی۔ میٹنگ میں امن و امان کی مجموعی صورتحال، جرائم کے انسداد اور پولیس کارکردگی کا تفصیلی جائزہ لیا گیا۔ڈی پی او ساجد حسین نے واضح اور دوٹوک احکامات جاری کرتے ہوئے کہا کہ پولیس کو جھوٹی اطلاع دینے یا بے بنیاد مقدمات کے اندراج کی ہرگز اجازت نہیں دی جائے گی۔ ایسے عناصر کے خلاف فوری طور پر مقدمات درج کر کے انہیں قانون کے کٹہرے میں لایا جائے گا اور جیل بھیجا جائے گا۔انہوں نے منشیات فروشوں کے خلاف بلاامتیاز کریک ڈاؤن جاری رکھنے کی ہدایت دیتے ہوئے کہا کہ اس ناسور کے خاتمے میں کسی قسم کی رعایت یا نرمی برداشت نہیں کی جائے گی۔تعلیمی اداروں کے گرد و نواح میں خصوصی نگرانی بڑھانے اور انٹیلی جنس بیسڈ کارروائیوں کو مزید مؤثر بنانے کے احکامات بھی جاری کیے گئے تاکہ نئی نسل کو منشیات جیسی لعنت سے محفوظ رکھا جا سکے۔ڈی پی او جھنگ نے سنگین جرائم میں ملوث عناصر کے خلاف فوری اور سخت کارروائی کی ہدایت دیتے ہوئے کہا کہ ایسے مجرمان کو قانون کی گرفت میں لا کر نشانِ عبرت بنایا جائے۔ انہوں نے تمام افسران کو روزانہ کی بنیاد پر اپنی کارکردگی رپورٹس پیش کرنے کا پابند کیا اور واضح کیا کہ فرائض میں غفلت یا کوتاہی برتنے والوں کے خلاف سخت محکمانہ کارروائی عمل میں لائی جائے گی۔مزید برآں، بین الاضلاعی روابط کو مؤثر بنانے پر زور دیتے ہوئے ہدایت کی گئی کہ جرائم پیشہ عناصر کی نقل و حرکت کو محدود کرنے کیلئے مربوط حکمتِ عملی اپنائی جائے اور ان کے فرار کے تمام ممکنہ راستے بند کیے جائیں۔ڈی پی او ساجد حسین نے اس عزم کا اعادہ کیا کہ جھنگ پولیس شہریوں کے جان و مال کے تحفظ کیلئے ہر ممکن اقدامات جاری رکھے گی اور قانون کی بالادستی کو ہر صورت یقینی بنایا جائے گا