وفاقی کابینہ کی اقتصادی رابطہ کمیٹی (ای سی سی) نے وزیرِاعظم کفایت شعاری فنڈ 2026 کے لیے 100 ارب روپے منتقل کرنے کی منظوری دے دی ہے۔ یہ فیصلہ اسلام آباد میں ہونے والے اجلاس میں کیا گیا جس کی صدارت وزیرِ خزانہ محمد اورنگزیب نے کی۔

اجلاس میں عبوری قومی گندم پالیسی 2025-26 کے تحت وفاقی اسٹریٹجک ذخائر کے لیے گندم کی خریداری کے عمل کا بھی جائزہ لیا گیا۔ اس موقع پر نجی شعبے کی شمولیت کے ذریعے شفاف اور مؤثر خریداری پر زور دیا گیا۔

کمیٹی نے اس بات کی اہمیت اجاگر کی کہ اسٹریٹجک اور کمرشل ذخائر میں واضح فرق رکھا جائے، تاکہ خریداری کے فیصلے حقیقی ضروریات کے مطابق ہوں اور غیر ضروری مالی یا ذخیرہ کرنے کے بوجھ سے بچا جا سکے۔

تفصیلی غور و خوض کے بعد ای سی سی نے نجی شعبے کے ذریعے شفاف اور مسابقتی عمل کے تحت زیادہ سے زیادہ 1.0 ملین میٹرک ٹن گندم کی خریداری کی منظوری بھی دے دی۔