جھنگ میں واردات، گھریلو جھگڑے اور ٹریفک حادثات؛ 8 افراد زخمی، ایک شہری کو نشہ آور چیز کھلا کر لوٹ لیا گیا،ریسکیو

جھنگ کے مختلف علاقوں میں ڈکیتی، گھریلو تنازع اور ٹریفک حادثات کے متعدد واقعات میں مجموعی طور پر 8 افراد زخمی ہو گئے جبکہ ایک شہری کو مبینہ طور پر نشہ آور چیز کھلا کر نقدی سے محروم کر دیا گیا۔ ریسکیو 1122 نے تمام واقعات پر بروقت کارروائی کرتے ہوئے زخمیوں کو ابتدائی طبی امداد فراہم کی اور ڈی ایچ کیو ہسپتال منتقل کر دیا۔

ریسکیو ذرائع کے مطابق اڈا سید والا ٹوبہ روڈ پر ایک 57 سالہ شہری محسن علی کو نامعلوم شخص نے مبینہ طور پر نشہ آور چیز کھلا کر نقدی چھین لی اور فرار ہو گیا۔ متاثرہ شخص نیم بے ہوشی کی حالت میں پایا گیا جسے ریسکیو اہلکاروں نے طبی امداد کے بعد ڈی ایچ کیو ہسپتال منتقل کیا۔

ادھر ملووانہ موڑ بھکر روڈ پر دو تیز رفتار کاریں کراسنگ کے دوران آپس میں ٹکرا گئیں جس کے نتیجے میں تین افراد زخمی ہو گئے۔ زخمیوں میں علی شیر، محمد طارق اور ساجد پرویز شامل ہیں جنہیں طبی امداد کے بعد ہسپتال منتقل کر دیا گیا۔

دوسری جانب کھیوہ اڈا چنیوٹ روڈ پر گھریلو تنازع کے باعث رشتہ داروں کے درمیان جھگڑا ہوا جس میں سمرین بی بی اور خاور عباس زخمی ہو گئے۔ ریسکیو ٹیم نے دونوں زخمیوں کو ابتدائی طبی امداد فراہم کرنے کے بعد ڈی ایچ کیو ہسپتال منتقل کیا۔

بستی سید والی شیخ علی روڈ پر دو تیز رفتار موٹر سائیکلیں آپس میں ٹکرا گئیں جس کے نتیجے میں کلیم اللہ اور محمد عاصم زخمی ہو گئے۔ ریسکیو 1122 نے موقع پر پہنچ کر زخمیوں کو طبی امداد فراہم کی اور ہسپتال منتقل کر دیا۔