ٹوبہ روڈ پر پیش آنے والے دو مختلف ٹریفک حادثات میں مجموعی طور پر 4 افراد زخمی ہوگئے جنہیں ریسکیو 1122 نے فوری طبی امداد فراہم کرتے ہوئے ڈسٹرکٹ ہیڈ کوارٹر (ڈی ایچ کیو) ہسپتال جھنگ منتقل کر دیا۔

پہلا حادثہ مہد الفقیر کے قریب ٹوبہ روڈ پر پیش آیا جہاں تیز رفتاری اور غفلت کے باعث دو موٹرسائیکلیں آپس میں ٹکرا گئیں۔ حادثے کی اطلاع ملتے ہی ریسکیو 1122 کی ایمبولینس موقع پر پہنچ گئی اور امدادی کارروائیاں شروع کر دیں۔

حادثے میں 50 سالہ سلیم رضا ولد ممتاز حسین اور ان کی 45 سالہ اہلیہ کلثوم بی بی زخمی ہوگئیں۔ دونوں کا تعلق ملوانہ موڑ جھنگ سے بتایا جاتا ہے۔ ریسکیو اہلکاروں نے ابتدائی طبی امداد فراہم کرنے کے بعد دونوں زخمیوں کو ڈی ایچ کیو ہسپتال جھنگ منتقل کر دیا۔

دوسرا حادثہ ٹالاں والا دربار، ٹوبہ روڈ جھنگ کے قریب پیش آیا جہاں ایک موٹرسائیکل اور ہائی ایس وین کے درمیان تصادم ہو گیا۔ اطلاع ملنے پر ریسکیو 1122 کی ٹیم فوری طور پر موقع پر پہنچ گئی اور زخمیوں کو طبی امداد فراہم کی۔

اس حادثے میں 21 سالہ محمد سلمان ولد غلام مرتضیٰ، رہائشی شوگر مل ٹوبہ روڈ، اور 22 سالہ محمد انور ولد محمد اسلم، رہائشی شفیع آباد مدوکی روڈ، زخمی ہوگئے۔ دونوں کو ابتدائی طبی امداد کے بعد ڈی ایچ کیو ہسپتال جھنگ منتقل کر دیا گیا۔