عید الاضحی کی آمد کے حوالے سے مویشی منڈیوں کی سکیورٹی مزید موثر بنا دی گئی,ڈی پی او

عیدالاضحیٰ کی آمد کے پیشِ نظر شہریوں کے جان و مال کے تحفظ اور مویشی منڈیوں میں امن و امان کے قیام کو یقینی بنانے کیلئے جھنگ پولیس نے سکیورٹی انتظامات مزید مؤثر اور مربوط بنا دیے ہیں۔ڈسٹرکٹ پولیس آفیسر جھنگ ساجد حسین کی خصوصی ہدایات پر ضلع بھر کی مویشی منڈیوں میں اضافی نفری تعینات کر دی گئی ہے تاکہ خریداروں، بیوپاریوں اور شہریوں کو محفوظ ماحول فراہم کیا جا سکے۔ڈی پی او جھنگ کے احکامات کے مطابق عیدالاضحیٰ کے خاص ایام تک 339 پولیس افسران اور جوان مختلف مویشی منڈیوں اور حساس مقامات پر سکیورٹی کے فرائض انجام دیں گے۔پولیس اہلکار نہ صرف داخلی و خارجی راستوں کی مؤثر نگرانی کریں گے بلکہ مشکوک افراد پر کڑی نظر رکھنے، ٹریفک کی روانی برقرار رکھنے اور ہنگامی صورتحال سے فوری نمٹنے کیلئے بھی ہمہ وقت متحرک رہیں گے۔ڈی پی او جھنگ ساجد حسین نے کہا کہ عید کے پرمسرت موقع پر شہریوں کو تحفظ اور اعتماد کا احساس ملنا چاہیے۔ مویشی منڈیوں میں جیب تراشی، نوسربازی، چوری اور دیگر جرائم کے امکانات کے پیشِ نظر سکیورٹی پلان کو مزید مضبوط کیا گیا ہے تاکہ کسی بھی ناخوشگوار واقعے کی گنجائش باقی نہ رہے۔انہوں نے واضح کیا کہ جھنگ پولیس عوامی تحفظ کیلئے مکمل طور پر الرٹ ہے، اور کسی بھی مشکوک سرگرمی، بدامنی یا قانون شکنی کے خلاف فوری اور بلاامتیاز کارروائی عمل میں لائی جائے گی۔جھنگ پولیس نے شہریوں سے بھی اپیل کی ہے کہ خریداری کے دوران غیر معمولی نقل و حرکت یا مشکوک افراد کی فوری اطلاع پولیس کو دیں تاکہ محفوظ اور پُرامن عید کے اجتماعی مقصد کو یقینی بنایا جا سکے۔