وزیراعظم کا فلسطین میں اسرائیلی بربریت پر عالمی خاموشی پر افسوس کا اظہار

وزیراعظم شہباز شریف نے کہا ہے کہ فلسطین میں جاری اسرائیلی بربریت پر عالمی برادری کی خاموشی تشویشناک ہے۔

وہ آج شام اسلام آباد میں اتحادی جماعتوں کے پارلیمانی نمائندوں کے اجلاس سے خطاب کر رہے تھے۔

وزیراعظم نے کہا کہ حماس کے رہنما اسماعیل ہنیہ کا قتل قابل مذمت ہے۔ انہوں نے کہا کہ اسرائیل نے اقوام متحدہ کی سلامتی کونسل سمیت عالمی اداروں کی منظور کردہ قراردادوں اور عالمی عدالت انصاف کے فیصلے کی سنگین خلاف ورزی کی ہے۔ انہوں نے کہا کہ عالمی عدالت انصاف نے اسرائیل کے جبر کو نسل کشی قرار دیا ہے۔

شہباز شریف نے کہا کہ اسرائیل کو اس نسل کشی سے روکنا جدید دنیا کے لیے بڑا چیلنج ہے۔

تاہم انہوں نے ان ممالک کو سراہا، جنہوں نے غزہ میں جاری اسرائیلی جبر کی مذمت کی ہے۔