پاکستان دوراہے پر: موسمیاتی تبدیلیوں کے بڑھتے ہوئے خطرات

ہماری بچپن کی کہانیاں عظیم تہذیبوں کے موسمیاتی تبدیلیوں کی وجہ سے زوال پذیر ہونے یا ڈائنوسار جیسے عظیم الجثہ مخلوقات کے ناپید ہونے پر مبنی ہوتی تھیں، جنہیں عام طور پر فسانہ یا ہالی ووڈ کی فلموں تک محدود سمجھا جاتا تھا۔ تاہم، یہ دور دراز کے واقعات اب ہمارے لیے سنگین حقائق بن چکے ہیں۔

پاکستان کا عالمی کاربن اخراج میں حصہ نہایت کم ہونے کے باوجود موسمیاتی تبدیلیوں سے سب سے زیادہ متاثرہ ممالک میں شامل ہے۔ گلوبل کلائمیٹ رسک انڈیکس 2023 کے مطابق، پاکستان موسمیاتی تبدیلیوں سے متعلقہ آفات کے لحاظ سے دنیا میں پانچویں سب سے زیادہ متاثرہ ملک کے طور پر درج ہے۔

یہ مسائل 2022 کے تباہ کن سیلابوں سے واضح ہوئے، جس نے ملک کو 15 ارب ڈالر سے زیادہ کے نقصانات پہنچائے۔ نیشنل ڈیزاسٹر مینجمنٹ اتھارٹی (این ڈی ایم اے) کی رپورٹ کے مطابق اس دوران  1,100 سے زیادہ قیمتی جانوں کے ضیاع اور 35 لاکھ افراد کے بے گھر ہوئے جو ایک  افسوسناک امر ہے۔ سیلاب نے 9.5 ملین گھروں اور ڈھانچوں کو نیست و نابود کر دیا، جبکہ دیہی علاقوں میں 8 لاکھ سے زیادہ مویشیوں کا نقصان ہوا۔ اسی طرح 2010 کا تباہ کن سپر فلڈ بھی پاکستان  بھر میں تباہی مچانے کا باعث بنا، جس میں 1,700 سے زیادہ افراد کی جانیں گئیں اور 20 لاکھ سے زیادہ افراد متاثر ہوئے۔ اس تباہی کا اثر ملک کی 20 فیصد زرعی زمین تک پہنچا، اس سیلاب کے دوران  1.1 ملین سے زیادہ مکانات کو نقصان پہنچا۔ اقتصادی نقصان کا تخمینہ 1.71 ٹریلین روپے تھا، جبکہ بحالی کے لیے مزید 1.156 ٹریلین روپے درکار تھے۔

پاکستان کو موسمیاتی تبدیلی کے باعث زبردست چیلنجز کا سامنا ہے، جنہیں جغرافیائی اور اقتصادی کمزوریوں نے اور بھی بڑھا دیا ہے۔ پانی کی قلت ایک فوری مسئلہ ہے، جس میں پاکستان کی پانی کی ضروریات زیادہ تر انڈس بیسن ٹریٹی پر منحصر ہیں۔ پہلے سے ہی دباؤ میں، پاکستان کے آبی نظاموں کو موسمیاتی تبدیلی کے باعث ہائیڈرو لوجیکل پیٹرن میں تبدیلی، گلیشیئر کے پگھلنے اور بے قاعدہ بارشوں سے مزید خطرہ ہے۔

یہ حالات اس بات کی نشاندہی کرتے ہیں کہ پاکستان کی بقاء کے لیے مقامی عوامل کو کنٹرول یا کم کرنا نہایت ضروری ہے جو موسمیاتی تبدیلی میں اپنا حصہ ڈالتے ہیں۔ ہنگامی اقدامات کی ضرورت ہے تاکہ ان اداروں کی کارکردگی کو بہتر بنایا جا سکے جو آفات کی روک تھام کے ذمہ دار ہیں، انفراسٹرکچر کی مضبوطی کو بڑھایا جا سکے، اور شہریوں کو ابتدائی انتباہی نظام کے ذریعے مؤثر جواب دینے کی صلاحیت دی جا سکے۔

بارش کے پانی کو محفوظ کرنے اور سیلاب سے ڈرپ اریگیشن کی طرف منتقلی میں سرمایہ کاری، پانی کی قلت کو کم کرنے میں مددگار ہو سکتی ہے۔ زراعت کو محفوظ بنانے کے لیے تحقیق میں بڑے پیمانے پر سرمایہ کاری کی ضرورت ہے تاکہ موسمیاتی تبدیلیوں سے محفوظ بیجوں کی اقسام تیار کی جا سکیں اور جدید کاشتکاری کے طریقوں کو اپنایا جا سکے۔ فوسل فیولز پر انحصار کم کر کے اور شمسی، پن بجلی، اور ہائیڈرو پاور جیسے قابل تجدید توانائی کے ذرائع کو فروغ دے کر فضائی آلودگی اور کاربن اخراج کو کم کیا جا سکتا ہے۔

موسمیاتی تبدیلی کی بنیادی وجوہات کو دور کرنے کے لیے مضبوط حکومتی پالیسیاں ناگزیر ہیں، جن کے ساتھ ٹیکنالوجی کی منتقلی اور بین الاقوامی تعاون کے لیے اقدامات کرنا بھی ضروری ہے تاکہ پاکستان کی ماحولیات سے نمٹنے کی صلاحیت کو مضبوط کیا جا سکے۔ زرعی شعبہ، جو روزگار اور غذائی تحفظ کی بنیاد ہے، موسمیاتی تبدیلی سے خاص طور پر متاثر ہو رہا ہے، کیونکہ پانی کے وسائل کی کمی اور غیر مستحکم موسمی حالات کا سامنا ہے۔ اس شعبے کو بڑھتے ہوئے درجہ حرارت، بے وقت بارشوں، سیلابوں اور خشک سالیوں سے لاحق خطرات نے روزگار اور غذائی عدم تحفظ کو بڑھا دیا ہے۔

علاوہ ازیں، ماحولیاتی افراتفری زندگیاں، املاک، اور انفراسٹرکچر کو تباہ کرتی ہے، جس سے بڑے پیمانے پر اقتصادی نقصانات ہوتے ہیں۔ موسمیاتی پیٹرنز میں تبدیلی سے صحت کے مسائل بھی بڑھ رہے ہیں، جن میں ڈینگی بخار جیسے امراض کی تعداد میں اضافہ ہو رہا ہے۔

شہری کاری اور صنعتی توسیع نے بحران کو مزید پیچیدہ بنا دیا ہے، جس کی وجہ سے فوسل فیولز کی مانگ بڑھ رہی ہے اور فضائی آلودگی، دھند اور گرین ہاؤس گیسوں کے اخراج میں اضافہ ہو رہا ہے۔ ان متنوع چیلنجوں سے نمٹنے کے لیے فوری اقدامات، مضبوط پالیسی فریم ورک، اور مربوط کوششوں کی ضرورت ہے تاکہ موسمیاتی تبدیلی کے اثرات کو کم کیا جا سکے اور پاکستان کے لیے پائیدار ترقی کے راستے کو فروغ دیا جا سکے۔

ان کوششوں کو مقامی کمیونٹیز کے درمیان موسمیاتی تبدیلی کے اثرات کے بارے میں آگاہی بڑھا کر اور انہیں فیصلہ سازی کے عمل میں شامل کر کے مزید مؤثر بنایا جا سکتا ہے۔ اس سلسلے میں مقامی حکومتیں اہم کردار ادا کرتی ہیں۔ مزید برآں، اسکول کے نصاب میں موسمیاتی تبدیلی کے موضوعات کو شامل کرنا ضروری ہے تاکہ نوجوان نسل کو اس چیلنج کا مؤثر طریقے سے مقابلہ کرنے کے لیے ضروری علم اور مہارت فراہم کی جا سکے۔

قدرتی نظاموں کے تحفظ کو ترجیح دے کر اور غیر ضروری مداخلتوں سے گریز کر کے، پاکستان عالمی سطح پر موسمیاتی تبدیلی کو کم کرنے کی کوششوں میں حصہ ڈال سکتا ہے اور پائیدار ترقی کے اہداف حاصل کر سکتا ہے۔ بالآخر، یہ نقطہ نظر نہ صرف کرہ ارض کے لیے فائدہ مند ہو گا بلکہ عالمی سطح پر موسمیاتی تبدیلی سے وابستہ خطرات کو بھی کم کرے گا۔

نعیم احمد