پریس کلب میں محفل نعت رسولﷺ اور سینئر صحافی آصف علی چوہان مرحوم کی یاد میں تعزیتی ریفرنس کا انعقاد

پریس کلب جھنگ میں سالانہ محفل نعت رسولﷺ اور سینئر صحافی ، ممبر پریس کلب اور جرنلسٹس گروپ کے دیرینہ ساتھی آصف علی چوہان مرحوم کی یاد میں تعزیتی ریفرنس منعقد کیا گیا۔ تقریب کی صدارت صدر پریس کلب لیاقت علی انجم اور صدر جھنگ یونین آف جرنلسٹس شریف طاہر نے کی ۔ تقریب میں بڑی تعداد میں ممبران پریس کلب اور جھنگ یونین آف جرنلسٹس ، معززین شہر اور آصف علی چوہان مرحوم کے اہل خانہ نے شرکت کی ۔ محفل نعت میں نامور نعت خوان فخر عباس تابش، آصف علی چشتی ، محمد اعظم چشتی اور دیگر نعت خوان حضرات نے بارگاہ رسالت میں عقیدت کے پھول نچھاور کئے۔ نقابت کے فرائض جاوید اقبال گوانس نے سر انجام دیئے۔ اس موقع پر قاری عبدالمقیت ہمدمی نے فلسفہ موت و حیات پر تفصیلی خطاب کیا ۔ صدر پریس کلب لیاقت علی انجم نے تقریب سے خطاب کرتے ہوئے اپنے دیرینہ ساتھی آصف علی چوہان کی اچانک وفات پر گہرے دکھ اور غم کا اظہار کرتے ہوئے کہا کہ آصف علی چوہان پریس کلب کی ہر محفل اور ہر تقریب کی شان اور جان تھے ۔ ان کی جرنلسٹس گروپ کے لئے خدمات گراں قدر ہیں ان کی اچانک وفات سے صحافی برادری کو دلی صدمہ ہوا ۔ انہوں نے کہا کہ آصف علی چوہان کا خلاءکبھی پورا نہیں ہو سکتا ۔ انہوں نے ان کے اہل خانہ کو پریس کلب کے تمام عہدیداران اور ممبران کی جانب سے اپنے بھر پور تعاون کا یقین دلایا۔ قاری عبدالمقیت ہمدمی نے آصف علی چوہان کے بلندی درجات اور ان کی مغفرت کے لئے خصوصی دعا کروائی۔