کیش لیس ڈیجیٹائزڈ معیشت کے فروغ کیلئے کمیٹی قائم

وزیراعظم محمد شہبازشریف نے کیش لیس ڈیجیٹلائزڈ معیشت کے فروغ کیلئے ایک کمیٹی قائم کی ہے۔

یہ کمیٹی بدھ کے روز اسلام آباد میں ایک اجلاس میں تشکیل دی گئی۔

 اس موقع پر خطاب کرتے ہوئے وزیراعظم نے کہا کہ معیشت کی ڈیجیٹلائزیشن حکومت کے اصلاحاتی ایجنڈے کی اولین ترجیحات میں شامل ہے۔

انہوں نے ہدایت کی کہ پالیسی اقدامات کے ذریعے ڈیجیٹل ادائیگیوں اور رقوم کی ڈیجیٹل منتقلی کی حوصلہ افزائی کی جائے۔

وزیراعظم نے کہا کہ وفاقی بجٹ میں کیش لیس اکانومی کے فروغ کیلئے کئی اقدامات تجویز کئے گئے ہیں۔

شہباز شریف نے کہا کہ حکومت غیر رسمی معیشت کے خاتمے کیلئے خریداری اور رقوم کی منتقلی کیلئے رقوم کی آن لائن ادائیگی کے فروغ کیلئے اقدامات کررہی ہے۔

وزیراعظم نے کہا کہ پاکستان کی معیشت میں بہتری کی بدولت مہنگائی کی شرح میں کمی اور ترسیلات زر میں اضافہ ہوا ہے۔