8 محرم الحرام کا مرکزی جلوس امام بارگاہ قصر زاہرہ پر پہنچ کر اختتام پذیر ہوگیا

آٹھ محرم الحرام کے موقع پر تعزیہ، علم اور ذوالجناح کا مرکزی جلوس امام بارگاہ سجادیہ بوہڑ والی گلی سے انتہائی عقیدت و احترام کے ساتھ برآمد ہوا۔ جلوس اپنے مقررہ اور روایتی راستوں سے ہوتا ہوا مغرب کے وقت امام بارگاہ قصر زہرا پہنچ کر اختتام پذیر ہوگیا، جہاں عزاداروں نے نوحہ خوانی اور ماتم کیا۔

جلوس کے دوران امن و امان کو یقینی بنانے کے لیے پولیس اور ضلعی انتظامیہ کی جانب سے سخت سیکیورٹی انتظامات کیے گئے تھے۔ مرکزی جلوس کی حفاظت کے لیے 400 سے زائد پولیس اہلکار و افسران تعینات رہے، جبکہ حساس مقامات پر اضافی نفری، موبائل گشت اور نگرانی کے خصوصی انتظامات بھی کیے گئے۔

ضلع بھر میں آٹھ محرم الحرام کے موقع پر مجموعی طور پر 63 جلوس برآمد ہوئے، جبکہ 229 مجالس عزا منعقد کی گئیں۔ تمام مذہبی اجتماعات پر ضلعی انتظامیہ، پولیس، ریسکیو 1122 اور دیگر متعلقہ ادارے مکمل طور پر متحرک رہے۔ سیکیورٹی کے فول پروف انتظامات اور متعلقہ اداروں کی مسلسل نگرانی کے باعث تمام جلوس اور مجالس پرامن ماحول میں اپنے اختتام کو پہنچیں۔