رمضان المبارک کے حوالہ سے ضلعی امن کمیٹی کا اجلاس

ڈپٹی کمشنر علی اکبر بھنڈر اور ڈسٹرکٹ پولیس آفیسر کیپٹن(ر) بلال افتخار کیانی کی زیر صدارت رمضان المبارک کے حوالہ سے ضلعی امن کمیٹی کا اجلاس منعقد ہوا جس میں امن کمیٹی کے ممبران سمیت انجمن تاجران و دیگر ضلعی افسران بھی موجود تھے۔ڈپٹی کمشنر نے کہا کہ رمضان المبارک کے دوران تمام مسالک اور مکاتب فکر کے لوگ امن و امان کے قیام کے لئے بھر پور کردار ادا کریں، اسلام ہمیں ہم آہنگی ،رواداری، اخوت و بھائی چارہ اور امن و امان کا درس دیتا ہے۔ ڈسٹرکٹ پولیس آفیسرنے کہا کہ اسلامی تاریخ میں امن و امان کے لحاظ سے باہمی بھائی چارہ،اخوت اور رواداری مسلمانوں کا طرہ امتیاز رہا ہے۔ تمام مسالک کے علماءکرام اپنے خطبات میں امن و امان کے حوالہ سے درس دیں،ضلع میں امن برقرار رکھنے اور عوام کے جان و مال کے تحفظ کے لئے ضلعی انتظامیہ اور پولیس کوئی کسر اٹھا نہیں رکھے گی۔ اجلا س میں رمضان المبارک کے حوالہ سے سیکورٹی پلان تشکیل دیا گیااور ہدایات جاری کی گئیں کہ ماہ رمضان میں امن اور رواداری کے حوالہ سے ہم سب بڑھ چڑھ کرحصہ لیں۔بعد ازاں شرکاءاجلا س نے امن کے حوالے سے انتظامیہ سے تعاون کی بھرپور یقین دہانی کرائی اور ملک و قوم کی سلامتی اور استحکام کےلئے دعا بھی کروائی گئی۔