ترجمان ریسکیو 1122 محمد زبیر کی جانب سے جاری کئے گئے پریس ریلیز کے مطابق پنجاب ایمرجنسی سروس ڈیپارٹمنٹ (ریسکیو 1122) جھنگ اور دی ایجوکیٹرز اسکول (الحیات کیمپس) جھنگ کے درمیان ایک مفاہمتی یادداشت (MOU) پر دستخط کیے گئے جس کا مقصد کمیونٹی کی فلاح و بہبود، خاص طور پر طلباء و اساتذہ کو ایمرجنسی صورتحال سے نمٹنے کی تربیت دینا ہے۔

اس مفاہمتی معاہدے کے تحت ریسکیو 1122 جھنگ، دی ایجوکیٹرز اسکول (الحیات کیمپس) کے طلباء اور اساتذہ کو مفت “لائف سیونگ اسکلز”، اسکول سیفٹی ٹریننگ اور ایمرجنسی انخلاء کی مشقیں فراہم کرے گا تاکہ کسی بھی ممکنہ حادثے کی صورت میں فوری ردِعمل کو ممکن بنایا جا سکے۔

دوسری جانب، دی ایجوکیٹرز اسکول (الحیات کیمپس) جھنگ نے ریسکیو 1122 کے شہداء اور حاضر سروس اہلکاروں کے بچوں کے لیے خصوصی تعلیمی رعایتوں کا اعلان کیا ہے، ریسکیورز کے بچوں کے لیے 100% داخلہ فیس معاف ہوگی،100% سیکیورٹی فیس معاف کی جائے گی،50% سالانہ فنڈ میں رعایت دی جائے گی،حاضر سروس ریسکیورز کے بچوں کے لئے

40% ماہانہ فیس میں رعایت فراہم کی جائے گی ۔ہر سال ماہانہ فیس میں صرف 10% اضافہ کیا جائے گااور ریسکیورز شہداء کے بچوں کے لیے %100 فیس معاف کی جائے گی۔یہ تمام رعایتیں صرف ان اہلکاروں کے بچوں کو دی جائیں گی جو ریسکیو 1122 میں خدمات انجام دے رہے ہوں یا شہید ریسکیورز کے ورثاء ہوں، اور جنہوں نے باقاعدہ تحریری ثبوت فراہم کیا ہو۔

اس موقع پر سی ای او دی ایجوکیٹرز اسکول (الحیات کیمپس) محترمہ افشاں حیات نے کہا:”ریسکیو 1122 ہمارے ملک کے حقیقی ہیروز ہیں، جنہوں نے اپنی جانوں کو خطرے میں ڈال کر ہزاروں قیمتی جانیں بچائیں۔ یہ ہمارا فرض ہے کہ ہم ان کے بچوں کو بہترین تعلیمی سہولیات فراہم کریں تاکہ وہ بھی ایک باوقار زندگی گزار سکیں۔”

ڈسٹرکٹ ایمرجنسی آفیسر جھنگ، ڈاکٹر میاں محمد اشفاق نے اپنے خیالات کا اظہار کرتے ہوئے کہا:”یہ معاہدہ نہ صرف عوامی آگاہی اور تربیت کے لحاظ سے ایک اہم قدم ہے، بلکہ ریسکیورز کے خاندانوں کے لیے تعلیمی معاونت بھی ایک خوش آئند اقدام ہے۔ ہم دی ایجوکیٹرز اسکول کے اس تعاون کو سراہتے ہیں۔”

معاہدے کی مدت ابتدائی طور پر دو سال کے لیے رکھی گئی ہے جس میں باہمی رضامندی سے توسیع کی جا سکے گی