پاکستان ،ازبکستان بین الحکومتی کمیشن (آئی جی سی)برائے تجارت، اقتصادی اور سائنسی و تکنیکی تعاون کا 10واں اجلاس آج (پیر)کو اسلام آباد میں منعقد ہوا۔

اجلاس کی مشترکہ صدارت وزیراعظم کے معاون خصوصی برائے صنعت و پیداوار ہارون اختر خان اور جمہوریہ ازبکستان کے وزیر برائے سرمایہ کاری، صنعت و تجارت، لازیز قدرتوف نے کی۔

اجلاس کے دوران دوطرفہ تعلقات کا جامع جائزہ لیا گیا اور اہم اقتصادی و سماجی شعبوں میں مشترکہ کوششوں کو فروغ دینے کے لیے مستقبل پر مبنی لائحہ عمل طے کیا گیا۔

دونوں فریقین نے 2025 میں منعقد ہونے والے گزشتہ آئی جی سی اجلاس کے بعد ہونے والی پیش رفت پر اطمینان کا اظہار کیا اور دوطرفہ تجارت، سرمایہ کاری اور اقتصادی تعاون کے فروغ کے عزم کا اعادہ کیا۔

فریقین نے ترجیحی تجارتی معاہدے (پی ٹی اے)کی اہمیت کو اُجاگر کیا، فیز ٹو مراعات کے تحت ہونے والی پیش رفت کا خیرمقدم کیا، اور دوطرفہ تجارت کے متفقہ ہدف دو ارب امریکی ڈالر کے حصول کے لیے ادارہ جاتی طریقہ کار کو تیز کرنے پر اتفاق کیا۔ اس ضمن میں تجارتی سہولت کاری، لاجسٹکس میں بہتری، کسٹمز کی ڈیجیٹلائزیشن، ٹرانزٹ ٹریڈ تعاون، علاقائی تجارتی راہداریوں کی ترقی، اور کاروبار سے کاروبار روابط کے فروغ پر زور دیا گیا، جسے کاروباری برادری کے لیے ویزا سہولت کاری سے معاونت فراہم کی جائے گی۔

دونوں فریقین نے محنت کشوں سے متعلق تعلقات کے لیے پہلے مشترکہ ورکنگ گروپ کے قیام پر بھی اتفاق کیا، جو لیبر موبلٹی، مہارتوں کی ترقی، کام کی جگہ پر تحفظ، اور روزگار ویزوں سے متعلق عملی امور پر توجہ دے گا۔ ٹرانسپورٹ اور مواصلات کے شعبے میں، کمیشن نے براہِ راست فضائی سروسز کے آغاز میں دلچسپی کا خیرمقدم کیا، علاقائی ریلوے اور رابطہ جاتی منصوبوں میں پیش رفت کا جائزہ لیا، اور علاقائی تجارت و ٹرانزٹ رابطہ کاری کو بہتر بنانے کے لیے متبادل ٹرانسپورٹ راہداریوں کو آگے بڑھانے پر اتفاق کیا۔

زراعت اور غذائی تحفظ میں تعاون اجلاس کا نمایاں پہلو رہا، جہاں ازبکستان سے پاکستان پھلوں کی برآمد کے لیے فائیٹو سینیٹری پروٹوکولز میں پیش رفت کا خیرمقدم کیا گیا۔

فریقین نے اضافی پروٹوکولز، مشترکہ ورکنگ گروپس، اور پودوں کے تحفظ، مویشیوں کی ترقی، اور زرعی تحقیق میں تکنیکی تعاون کے ذریعے اشتراک کو وسعت دینے پر اتفاق کیا، جس کا مشترکہ مقصد غذائی تحفظ اور پائیدار زرعی ترقی ہے۔

اعلی تعلیم، سائنس اور ٹیکنالوجی کے شعبے میں، کمیشن نے دونوں ممالک کے ممتاز تعلیمی و تحقیقی اداروں کے مابین شراکت داری میں پیش رفت کا خیرمقدم کیا۔ فریقین نے مشترکہ تحقیق، اساتذہ اور طلبہ کے تبادلوں، فنی و پیشہ ورانہ تربیت، جدت، اور استعداد سازی کے فروغ پر اتفاق کیا، جنہیں سائنسی، تکنیکی اور جدتی شعبوں میں حال ہی میں دستخط شدہ معاہدات کی معاونت حاصل ہوگی۔ ان اقدامات کا مقصد طویل المدتی علمی تعاون اور انسانی وسائل کی ترقی کو مضبوط بنانا ہے۔

ماحولیاتی اور موسمیاتی تعاون کو مشترکہ ترجیح تسلیم کیا گیا، جس کے تحت موسمیاتی مزاحمت، برفانی ماحولیاتی نظام کے تحفظ، پائیدار آبی انتظام، ماحولیاتی گورننس، صنفی شمولیت پر مبنی موسمیاتی اقدامات، اور کمیونٹی سطح پر موافقتی حکمتِ عملیوں میں تعاون پر اتفاق کیا گیا۔ دواسازی کے شعبے میں، فریقین نے ریگولیٹری تعاون کو مضبوط بنانے، مشترکہ منصوبوں اور سرمایہ کاری کے فروغ، دوا ساز اداروں کے تبادلوں، اور طبی مصنوعات کے معیار اور تحفظ کو یقینی بنانے کے لیے استعداد سازی پر اتفاق کیا۔

کمیشن نے توانائی و معدنیات، انفارمیشن ٹیکنالوجی، ٹیلی کمیونیکیشن، چھوٹے و درمیانے درجے کے کاروبار، صنعت، بینکاری اور مالیات کے شعبوں میں بھی تعاون کو آگے بڑھایا۔ مشترکہ ورکنگ گروپس کو مضبوط بنانے، ڈیجیٹلائزیشن اور جدت کے فروغ، ایس ایم ایز کی مسابقت بڑھانے، صنعتی شراکت داریوں کے فروغ، بینکاری تعاون میں توسیع، اور ادارہ جاتی استعداد میں اضافے پر اتفاق کیا گیا۔

اپنے خیالات کا اظہار کرتے ہوئے ہارون اختر خان اورلازیز قدرتوف نے پاکستان اور ازبکستان کے درمیان مضبوط دوطرفہ تعلقات کی توثیق کی اور سیاسی خیرسگالی کو ٹھوس اقتصادی نتائج میں ڈھالنے کی اہمیت پر زور دیا۔ انہوں نے اس اعتماد کا اظہار کیا کہ آئی جی سی اجلاس کے دوران کیے گئے فیصلے ادارہ جاتی روابط کو مضبوط کریں گے، نجی شعبے کی شمولیت کو فروغ دیں گے، اور دونوں ممالک میں پائیدار اقتصادی ترقی میں معاون ثابت ہوں گے۔

حکومتِ پاکستان نے 10ویں آئی جی سی اجلاس کے نتائج پر اطمینان کا اظہار کیا اور کہا کہ طے شدہ فیصلے تمام ترجیحی شعبوں میں دوطرفہ تعاون کو مضبوط بنانے کے مشترکہ عزم کی عکاسی کرتے ہیں۔ دونوں فریقین نے باہمی مشاورت سے طے شدہ تاریخوں پر تاشقند میں بین الحکومتی کمیشن کا 11واں اجلاس منعقد کرنے پر اتفاق کیا۔