شیعہ علماء کونسل کے زیرِ اہتمام ضلعی کنونشن اور شہیدِ راہِ اسلام رہبرِ معظم کانفرنس امام بارگاہ قدیمی جھنگ سٹی میں منعقد ہوئی

شیعہ علماء کونسل کے زیرِ اہتمام ضلعی کنونشن اور شہیدِ راہِ اسلام رہبرِ معظم کانفرنس امام بارگاہ قدیمی جھنگ سٹی میں منعقد ہوئی، جس کی صدارت صوبائی نائب صدر سید مسعود الحسن ترمذی نے کی۔ کانفرنس میں مرکزی جنرل سیکرٹری سمیت تنظیمی عہدیداران، کارکنان اور ارکان کی بڑی تعداد نے شرکت کی۔کنونشن کے دوران مولانا لیاقت علی سیال بلا مقابلہ ضلعی صدر شیعہ علماء کونسل جھنگ منتخب ہو گئے۔ اس موقع پر نو منتخب عہدیداران نے تنظیمی استحکام، ملتِ جعفریہ کی فلاح و بہبود اور دینی و ملی خدمات کے فروغ کے عزم کا اظہار کیا۔بعد ازاں پریس کانفرنس سے خطاب کرتے ہوئے علامہ ڈاکٹر شبیر حسن میثمی نے کہا کہ خطے میں امریکہ کا اثر و رسوخ کمزور جبکہ اسلامی قوتیں مضبوط ہو رہی ہیں۔ انہوں نے کہا کہ ایران نے مشکل حالات میں بھی مزاحمت اور اتحاد کا مظاہرہ کیا جبکہ پاکستان نے ایران، سعودی عرب اور دیگر مسلم ممالک کے درمیان سفارتی روابط میں مثبت کردار ادا کیا ہے۔ انہوں نے مسلم ممالک کے اتحاد، ایران کے ساتھ اقتصادی تعاون اور پاکستان کے بڑھتے ہوئے سفارتی کردار کو خطے کے لیے خوش آئند قرار دیا۔ کانفرنس میں شہدائے ملت کو خراجِ عقیدت پیش کیا گیا اور ملک میں امن، استحکام اور امتِ مسلمہ کے اتحاد کے لیے خصوصی دعائیں بھی کی گئیں۔