جھنگ میں 7 محرم الحرام کا مرکزی علم و ذوالجناح جلوس امام بارگاہ قدیمی پر پہنچ کر اختتام پذیر، جلوس کے لئے سیکورٹی کے سخت انتظامات کئے گئے

سات محرم الحرام کے موقع پر علم اور ذوالجناح کا مرکزی جلوس امام بارگاہ مہاجرین جھنگ سٹی سے نماز فجر کے بعد برآمد ہوا۔ جلوس اپنے مقررہ اور روایتی راستوں سے ہوتا ہوا شام کے وقت امام بارگاہ قدیمی پہنچ کر اختتام پذیر ہوگیا۔

ضلع بھر میں سات محرم الحرام کے دوران مجموعی طور پر 36 جلوس نکالے گئے جبکہ 223 مجالس عزاء کا انعقاد کیا گیا۔ تمام جلوسوں اور مجالس کے لیے ضلعی انتظامیہ اور پولیس کی جانب سے فول پروف سیکیورٹی انتظامات کیے گئے تھے۔

مرکزی جلوس کے راستوں پر پولیس، ایلیٹ فورس، ریسکیو اداروں اور دیگر قانون نافذ کرنے والے اہلکار تعینات رہے، جبکہ داخلی و خارجی راستوں پر سخت چیکنگ اور نگرانی کا مؤثر نظام بھی قائم رکھا گیا۔ عزاداروں نے پرامن ماحول میں مذہبی عقیدت و احترام کے ساتھ اپنی رسومات ادا کیں، جبکہ ضلعی انتظامیہ اور متعلقہ اداروں نے جلوس کے روٹ پر صفائی، روشنی اور دیگر سہولیات کی فراہمی کو بھی یقینی بنایا۔

پرامن اور منظم انتظامات کے باعث ضلع بھر میں سات محرم الحرام کے تمام جلوس اور مجالس بخیر و عافیت اختتام پذیر ہوئیں۔